Sabtu, 28 November 2020
KISAH DUGAL AKHMAD HUSAINI :
KAGIATAN SAHARI-HARI
Mandangar alaram hapi babunyi, lalu Dugal langsung bapuat. Inya sudah maatur jam wikir dihapinya, satangah jam sabalum sambahiyang Subuh. Balalu maambil handuk tuju ka pabanyuan, handak mandi.
Sabalum mandi, ka wisi dahulu bahira. Imbahitu ka muka lawang, manyatil karan banyu gasan mahibaki imbir ganal di pabanyuan. Imbahitu inya mandi. Sudah satahunan Dugal bangun Subuh lalu mandi. Imbah mandi bapakayan gasan sambahiyang Subuh.
Dugal tamasuk urang nang kada kaya urang dalam bapakayan. Hanya baisi dua talu haja baju muslim gasan dipakai saban hari ka Langgar atawa Masigit gasan sambahiyang pardu. Husus di Langgar Al Kautsar Dugal mamakai baju sama gasan sambahiyang lima waktu, baju lawan tapih sama, waktu Subuh, Luhur, Ashar, Maghrib, wan Isya.
Asa supan haja pang mamakai nintu-nintu tarus. Inya saurang nang mambuat istilah NTB, yakni kahundapan matan Nintu Tarus Baju. Ada haja haja duit gasan manukar nang hanyar. Tapi sudah kanyamanan baju nintu nang nyaman disantak.
Baju nintu sudah labih dua tahunan saku ditukar. Ada nang bawarna biru, hijau, wan habuk. Amun warna putih cagar kalihatan tahi lambuannya. Tapi karna warna lain jadi tasamarakan ulih warna nang ada.
Dugal katuju banar bajalanan basapida mutur kuliling kampung, kada singgah kada, cuma maliwati haja. Jadi tahu kaadaan kampung urang wahini. Kaya di Tanayung wan Pandulangan, ada pangganalan jalan, higa mahiga ada salukan banyu, pinggir jalan disamin.
Hulu Sungai Selatan, 28 November 2020
Tidak ada komentar:
Posting Komentar