Kaya biasanya buhan Dugal takumpulan di
warung Acil Bulkis, nang andaknya kada jauh pada gardu pus runda. Di warung
nintu ada haja nang dipandirakan buhannya.
“ Wayahini manusia kada tahu supan lagi.
Apalagi bibinian nang mambuka aurat dihadapan urang banyak mambuat lalakian jadi
kacar malihatnya,” ujar Gabau manyurung pandir.
“ Bahari kada harapan kaya itu, inya gin
supan disambat kada baadat,” ujar Undat.
“ Ini kalu sudah jamannya Dat ai. Hidup
kada baaturan lagi. Manggawi sakahandak hati saurang haja,” ujar Gabau.
“ Napa nang buhan ikam pandirakan.
Kudangar sual supan-supan. Dimana manukarnya ? ” ujar Dugal nang hanyar datang.
“ Kada inya sual supan-supan nang kawa
diulah sayuran itu pang. Tapi ini sual supan santun Gal ai,” ujar Undat.
“ Uuuh itukah. Kukira ada urang nang
bajual supan-supan nyaman aku manukar,” ujar Dugal.
“ Napa Gal bini ikam mangidamkah handak
manggangan supan-supan,” ujar Gabau.
“ Kada pang. Tapi lawas banarham kami
kada marasani,” ujar Dugal.
“ Lihati Bau. Dugal nih kada tahu supan
jua. Baju kada sing kimaan,” ujar Undat nang hanyar taitihi baju Dugal.
“ Aku kada ingat buhannya ai. Tapi aku
ada pangalaman bahari waktu masih duduk di SR alias Sakulah Rakyat,” ujar Dugal
maalih pandir.
“ Kaya apa pangalamannya Gal ? ” takun Gabau
handak tahu.
“ Karna tadi buhan ikam bapandir sual
supan santun. Ini ada hubungannya yaitu saikung guru nang ampih maajar marga
kasupanan,” ujar Dugal.
“ Napa marga supan haja maka jadi ampih.
Sayang banar padahal amun wayahini jadi guru kangalihan,” ujar Undat.
“ Gurunya nang maajar kami itu lalakian.
Sidin sudah tuha. Kami buhan anak muridnya bahanu tatawaan bila pas sidin
maajar,” ujar Dugal.
“ Napa mati buhan ikam tatawaan Lui ?”
ujar Gabau.
“ Nang kami tawaakan karna waktu sidin
maajar bahadap kaanu kami. Risliting salawar sidin babukaan. Kira-kira sidin
wayah nintu kada ingat mangaririk. Atawa jua risliting salawar sidin nintu
sudah rusak. Lawan jua pas sidin kada basalawar dalam. Burung sidin kalihatan
handak tarabang. Karna kada marasa tantu sidin kalihatan handak tarabang. Karna
kada marasa tantu sidin ranai haja. Samantara kakawananku tamasuk aku, apalagi
nang bibinian kihik-kihik tatawa sambil pina asa supan mancangangi,” ujar Dugal.
“ Kaya apa imbah nintu. Sariklah sidin
Lui,” ujar Undat.
“ Sidin kada sarik pang. Imbah kaluar
kalas kami itihi hanyar sidin marasa. Kulihat sidin pina lihum saurangan. Tapi
imbah kajadian nintu sidin kada maajar lagi di kalas kami,” ujar Dugal.
“ Hau ampihkah sidin ? Apakah ada
hubungannya marga supan tadi,” ujar Gabau.
“ Sapalih ada jua pang kalu. Tapi nang
pasti imbah kajadian lucu sakaligus manyupanakan nintu kada lawas sidin
gagaringan karna umur sidin sudah tuha. Kada lawas maninggal,” ujar Dugal.
“ Bah dikira bujuran ampih jadi guru
marga kasupanan. Pantas haja amun maninggal dunia. Dugal....Dugal.....Dugal....”
ujar buhannya gagarunum kakalahan. (ahu)
