Pabila buhan pian bulik ka Hangkinang. Handak
kaya bahari lagi. Rami waktu kakanakan takumpulan di rumah nini wan kai.
Rami mandi di sungai, bajukung kumbar,
mancari kijing, naik rapung sangkuang lalu batajun ka sungai. Hari Ahad tulak
ka pahumaan.
Umpat bakacal di pahumaan nang banyunya
mulai kacap-kacapan. Ada dapat papuyu wan kalicingan, saimbir baulih di bawa
bulik ka rumah.
Saban malam imbah Maghrib kita balajar
mangaji alip-alipan hingga tamat Al Quran. Imbah Isya bamainan gilaan tukup di
Pasar Hangkinang. Parak pukul sablas hanyar bulikan.
Taingat jua bila bulan Ramadhan datang.
Baulah laduman paring dibunyiakan siang wan malam. Malam salikur maulah lampu
banyak-banyak, diulah matan karungkung kalimbuai.
Diandak di muka rumah, manambah samarak
malam ka dua puluh satu bulan puasa. Hari raya kita batakbiran di Langgar Al
Kautsar.
Ulun rindu kaya bahari, pabila pang
buhan pian bulikan ka Hangkinang. (akhmad husaini)
Tidak ada komentar:
Posting Komentar