Dugal pina kada basamangat lagi bagawi.
Imbah inya tahu habar, wadah inya bagawi kada paringkat panambayan lagi dalam
manulis barita sa Banua. Tahun ini hanya paringkat ampat haja.
Tahu kaya itu Paman Adur manasihati anu
Dugal. “Kada usah dipikirakan Dugalai. Mungkin ada hikmah dibalik samunyaan
ini. Tahun ini gagal, bisa tahun kaina kita suksis. Ruda kada baada di atas
tatarusan,” ujar Paman Adur.
Dugal hinip. Tapi inya mamarutis. “Caka
paringkat panambayan kawa batagih macam-macam anu bus. Kaya tahun dahulu pas
paringkat panambayan handak kudakan ditukarakan kudakan, handak liptup
ditukarakan liptup, handak hapi ditukarakan hapi,” ujar Dugal.
Wayahini kada kawa kaya itu. Supan batagih
amun hanya paringkat ampat haja.
“Napa garang Gal marganya maka tahun ini
tadi paringkat sasain turun,” ujar Paman Adur batakun.
Lalu Dugal manyampaiakan, diantaranya
marga antina wipi nang rubuh ditiup angin. Jadi mangganggu dalam pangiriman
barita, masih tagantung wan intirnit, samingguan labih kada kawa mangirim
barita.
Masalah lain barita nang dikirim rancak ditulak
buhan admin marga banyak alasan, kaya isi barita kada sasuai lawan katantuan
barsama. Padahal sudah tuhuk bauyuh-uyuh bapikir manulis barita.
Manurut Paman Adur, kadada panghargaan pun
Dugal tatap manulis, karna manulis sudah hubinya.
“Inggih Paman ai ulun tatap samangat,
sasuai sambuyan hidup ulun tiada hari tanpa manulis,” ujar Dugal. (akhmad
husaini)
Tidak ada komentar:
Posting Komentar