Kisah Dugal : Singgah di Warung Gaza Bakarung

Kamis, 24 Oktober 2019

Bulik matan Kandangan, Dugal singgah di Warung Gaza Bakarung, nang andaknya parak Langgar Imaduddin Bakarung. Ada puluhan kali saku Dugal singgah di warung nintu. Andaknya di pinggir jalan raya subalah kiwa arah Kandangan - Banjarmasin.

Dugal mamasan is satrup. Lalu maambil wadai panas, nang hanyar dibangkit matan rinjing. Ada guguduh pisang manurun, tahu isi, bakwan jagung, guguduh gumbili, ardat, wan lain-lain. Mancari wadah duduk nang nyaman wan pas. Biasa Dugal di subalah kiwa, nyaman saurangan, bibas mahantup wadai nang sudah diambil. Wadai nintu kawannya bacacap lawan patis.

Banyak lukisan nang di tikap di dinding warung nintu. Dugal kada suah batakun napa mati dingarani Warung Gaza? Apakah ada hubungannya lawan Gaza nang ada di Palistina nintu? Jua kada suah batakun siapa urang nang bisa maulah lukisan nang banyak batikapan di dinding warung.

Warung Gaza rancak disinggahi, kada haja warga saputaran Bakarung, tapi jua urang jauh nang singgah, baik datang basapida mutur atawa bamutur. Nang pasti urang rancak singgah di warung nintu, gasan di makan di tampat, atawa dibawa bulik ka rumah maupun ka wadah bagawi.

Di Warung Gaza ada jua minuman nang bisa dipilih sasuka hati, kaya tih is, tih panas, is campur, is nyiur, satrup, wan lain-lain. Salain wadai panas ada jua puracit wan lupis. Tuntung bayar napa nang sudah dinikmati, Dugak bulik ka rumahnya di Hangkinang, ampat pal jauhnya pada Warung Gaza nintu. (ahu)