Kampung Labung Anak, andaknya di Ilung,
Kecamatan Batang Alai Utara, Kabupaten Hulu Sungai Tengah (HST). Wadah nang nyaman
gasan mananangakan pikiran, jauh matan suasana galu.
Dugal bila ada waktu wan kasampatan inya
bajalanan ka sana, nang jaraknya sakitar 30 pal matan rumahnya di Hangkinang. Biasanya
amun ka sana Dugal badua lawan kawannya. Tulak siang, buliknya bisa tangah
malam. Napa haja nang digawi Dugal di sana?
Biasanya inya singgah di rumah kawannya,
laki bini, nang baisi anak lalakian. Nang laki asli Labung Anak. Samantara nang
bini urang Batu Tangga. Bapandiran wan silaturrahmi tujuan Dugal bila ka sana.
Jua dibawai ka tampat nang manarik saputaran
Labung Anak, Ilung maupun Birayang. Bisa ka wadah urang bajual buah-buahan,
wawarung, wll. Suasana kampung nang ranai matan suara kandaraan, kaya sapida
mutur wan mutur.
Karena andaknya di dalam, kada di pinggir
jalan raya, kaya rumah Dugal di Hangkinang. Jadi Dugal himung banar amun baada
di Labung Anak, malah handak balawas.
Warganya nang ramah tamah. Jadi tinggal
kita haja, sabagai tamu babisa-bisa. Bila waktu sambahiyang tiba, Dugal lawan
kawannya, sambahiyang di Langgar nang bajarak 100 mitir pada rumah kawannya
nintu. (ahu)
Tidak ada komentar:
Posting Komentar