Imbah Isya buhan Dugal takumpulan di
gardu pus runda. Di gardu, sambil malihat tipi, badumlah wan bacatur. Salain Dugal
ada kakawanannya nang lain kaya Undat, Kacit, Gabau, wan lain-lain. Buhannya
rami mamandirakan hal-hal nang hangat wayahihni. Macam-macam pandiran nintu
gasan maisi malam, hingga kada tarasa parut garurukan.
Lalu Dugal baampah ka Warung Acil Bulkis
nang ada kada jauh pada gardu pus runda nintu, sakitar 10 mitiran jaraknya.
Acil Bulkis bawarung mulai kamarian sampai malam. Warung mulai puang, Acil
Bulkis cagar basisimpun handak tutup. Tapi malihat Dugal datang, Acil Bulkis
manawari minum napa anu Dugal.
Balalu Acil Bulkis maulahakan tih manis
gasan Dugal. Karna wadai habisan, Dugal inta ulahakan mi barandam, Sutu Banjar Limau
Kuit. Kada lawas nang lainnya, datangan jua ka Warung Acil Bulkis.
Sama kaya Dugal inta ulahakan banyu tih
wan mi barandam. Di galas ada kacang batipak, buhannya mamakan kacang nintu, sambil
manunggui mi masak. Parak pukul sawalas malam, hanyar buhan Dugal bulikan ka rumah
masing-masing. Isuk cagar ka gawian, jangan sampai malandau, kada ingat jua ba
Subuh. (ahu)
Tidak ada komentar:
Posting Komentar