Masih kaingatan Dugal waktu bahari, di Sakulah
Dasar (SD). Bila Arba Mustamir, bajalanan talu pal pada sakulahan bajalan
batis. Basangu nasi bungkus wan banyu babutul. Arba Mustamir, adalah hari Arba
paampihan bulan Shafar dalam almanak Hijriyah.
Guru di SD mambaritahu saminggu badahulu
anu anak muritnya, bahwa cagar manamui Arba Mustamir, disuruh mambawa makanan,
kaya nasi bungkus, wadai, jua banyu babutul. Supaya siap umpat bajalanan.
Sakulah SD Dugal di Hangkinang, biasanya
buhannya bajalanan waktu Arba Mustamir ampah ka Kayu Abang. Mulai sakulahan,
lalu Jalan Timbuk Ril, ka simpangan Tawia, baampah ka Kayu Abang.
Waktu uyuh singgah di tangah jalan, nang
banyak rapun-rapun ganal, gasan kanaungan. Di situ buhannya makanan. Dugal
umpat jua acara Arba Mustamir nintu. Inya sudah ditukarakan kuitannya nasi
bungkus, wadai babarapa buting, wan banyu tih nang dibuat kadalam butul akua.
Rami buhan Dugal bajalanan, sambil
bagayaan di jalan, salajur malihat pamandangan alam nang dilalui. Karna di kiwa-kanan
jalan banyak pahumaan, rapun nyiur, gatah, wan lain-lain. Sampai wayahini, Dugal
masih haja ingat lawan pangalaman Arba Mustamir waktu SD nintu.
Wayahini, di sakulahan wadah bagawi,
saban Arba Mustamir, buhan guru wan siswa bakumpul di halaman muka. Baduduk di
kursi palastik, baimbai atawa basama-sama mambaca Surah Yasin wan do’a muhun kasalamatan
tahindar matan bala bancana. (ahu)
Tidak ada komentar:
Posting Komentar