Kamarian Ahad samalam Dugal bakujuk
ampah ka Barabai. Imbah sambahiyang Ashar inya balalu mangalunyur basapida
mutur. Manuju arah Mandingin, jaraknya sakitar 25 pal pada Hangkinang, wadah
inya bagana.
Sabalumnya di halaman Masjid Agung
Riadhusshalihin Barabai, Dugal batamuan lawan kawannya urang Ilung, Acil Iris,
guru sanawiyah di Barabai, lawan anaknya bangaran Tasya.
Dugal mambari Acil Iris buku karianya
nang hanyar, yakni Kumpulan Puisi Tatirah
Tanah Amandit wan Kumpulan Pengalaman
Misteri Pamanar Pulau Kadap.
Himung banar Acil Iris dapat buku nintu.
Salain buku, Dugal jua mambari’i Acil Iris ulih-ulih has Hangkinang. Acil Iris
maucapakan tarima kasih banyak atas pambarian Dugal nintu. Kada lupa mando’aakan
samuga Dugal tatap samangat tarus dalam bakaria. “Ulun hadangi karia nang lain,
baik buku atawa tulisan di blog pian, “ ujar Acil Iris.
Imbahitu Dugal dibawai Acil Iris wan anaknya
ka warung panas nang ada di Mandingin, maksudnya warung panas adalah warung nang
manjual macam-macam sangaan nang hanyar dibangkit. Ada guguduh, tahu isi,
ardat, apulu, pastil, bakwan, wan lain-lain (wll).
Ada jua makanan kaya lapat, pundut, nasi
kuning bungkus daun pisang, wll. Andak wawarung nintu subalah kanan arah Barabai
manuju Tanjung. Liwar payu banar warung nintu, hingga bangku sasak lawan
pangunjung.
Jadilah Dugal batalu, lawan Acil Iris
wan Tasya, singgah di warung nintu. Dugal mamasan tih is. Samantara Acil Iris
wan Tasya minum tih dingin. Dugal maambil guguduh pisang manurun nang hanyar
dibangkit matan rinjing ulih ampun warung.
Walau panas tatap haja ngarannya Guguduh
Mandingin. Sudah jadi kabiasaan Dugal amun mamakan guguduh kawannya patis. Kada
tarasa lima buting guguduh habis dihantupnya. Ditambah sabigi lapat wan dua
buting ardat.
Imbah tuntung lalu bayar, asing-asingnya
bulik. Dugal bulik ka Hangkinang, Acil Iris wan anaknya Tasya ka Ilung. Tapi
Dugal kada langsung ka Hangkinang, singgah dahulu di Masjid Agung
Riadhusshalihin Barabai sambahiyang Maghrib. Lalu ka Pasar Barabai, nukar ubat
asma di aputik langganannya. (ahu)
Tidak ada komentar:
Posting Komentar