Jam wikir Dugal babunyi pukul 04.25
WITA. Balakas Dugal kaluar kalambu, lalu marapiakannya. Imbahitu manuju
pabanyuan, batatapas pakaian nang sudah di pakai sahari sabalumnya. Lalu mandi,
baudu, wan bapakaian muslim.
Lalu inya tulak ka Langgar Al Kautsar, nang
bajarak sakitar 50 mitir matan rumahnya, manyubarang jalan raya. Biasanya Dugal
hanyar ka Langgar Al Kautsar, imbah tuntung bang kamat. Masuk sap pamulaan,
sisi kanan, kada jauh pada Imam.
Subuh kali ini nang jadi Imam H Atur,
tutuha kampung dugal. Waktu bawirit, ada datang talu urang tamu nang singgah sambahiyang
Subuh. Dua lalakian, saikung bibinian.
Nang batalu nintu mamakai baju nang
sama, saragam agawai nagri Korpri, karna
pas tanggal tujuh walas, mungkin buhannya nintu handak umpat upacara Apel Kesadaran, di Banjarbaru kah? Dimanakah? Kada sawat batakun
pang.
Mimang Langgar Al Kautsar jadi panyinggahan
urang matan mana haja, baik handak sambahiyang pardu, atawa sakadar handak
bakamih wan bahira haja. Alasan singgah di Langgar Al Kautsar, karna parak wan
jalan raya, kada tapi jauh singgah urang nang datang matan hulu. (ahu)
Tidak ada komentar:
Posting Komentar