Saban hari kucing anum nintu ada tarus
di rumah Dugal. Warna habuk bagaris di awaknya. Katuju banar maulit lawan Dugal.
Bahanu asa muyak jua malihat, muyak banar. Sampai guring malam, kucing nintu
umpat masuk ka dalam kalambu Dugal, barabah di tilam.
Nang kada katuju bila waktu makan, kucing
nintu umpat jua handak makan. Sudah dibari nasi tapi kada mamakan. Handak iwak,
tapaksa dijurungi iwak. Tatap haja kucing nintu mangganggu. Kabiasaan di rumah kucing
nintu guring parak tipi.
Talihat kucing nintu mambarasihi awak
batimpungas, lawan ilat. Sudah lawas, sudah batahunan. Bila kada di rumah
Dugal, di rumah urang parak Dugal. Tapi sahari pasti ada kucing nintu di rumah,
baik siang atawa malam.
Ada jua baiknya ada kucing dalam rumah
Dugal. Kawan Dugal waktu kasunyian. Jua tikus kada tapi talihat lagi di rumah
Dugal. Rancak kucing pakulih tikus nang dinikmati di parak Dugal barabah. (ahu)
Tidak ada komentar:
Posting Komentar