Amun urang disambat ngaran binatang biasanya
pasti sarik. Tapi amun Dugal nang disambati, inya malah himung. Disambat urang
Kutu Buku. Karna inya dikanal paling katuju mambaca, tarutama buku, wan bacaan
lain kaya surat kabar.
Sudah mulai kakanak, pas SD, imbah istirahat
inya biasa ka parpustakaan nang ada di sakulahannya. Napa haja bukunya, inya
hantup tarus. Tarutama buku kisah, puisi, wan tulisan nang bahubungan lawan
sastra lainnya.
Jadinya wayahini bakat manulis marupaakan
buah masa lalu, nang katuju mambaca. Mambaca tatap haja inya katujui sampai
wayahini. Pamulaan nang manggalari kutu buku nintu adalah Acilnya, ading Umanya.
Karna waktu di rumah dilihat nang Acil, Dugal
kari mambaca haja. Urang lain asik malihat tipi inya malah mambaca. Surat kabar
pambungkus manukar bawang habang di pasar dibuka, lalu dibacanya.
Jua surat kabar pambungkus nasi nang dijual
urang di wawarung. Dibacanya hanyar dibuang. Amun manarik atawa panting
biasanya surat kabar nintu ditatak lawan gunting, lalu ditikap ka buku gasan dikaliping.
Jadi disambat binatang Dugal kada sarik, karna gasan kabaikan inya jua. (ahu)
Tidak ada komentar:
Posting Komentar