Rabu, 17 Maret 2021
Rezqie MA Atmanegara diranakakan di Kabupaten Hulu Sungai Tengah (HST). Huluagah Sanggar Buluh Marindu Kalimantan Selatan. Wadah kaganaannya di Jalan A Yani Padang, Barikin, RT 05 RW 03, Kecamatan Haruyan, Kabupaten HST, Kode Pos 71363.
Berikut Puisi Bahasa Banjar Rezqie MA Atmanegara yang merupakan Juara I Lomba Cipta Puisi Bahasa Banjar Aruh Sastra Kalimantan Selatan (ASKS) XVII Kabupaten Tabalong Tahun 2020.
PUISI BAHASA BANJAR REZQIE MA ATMANEGARA :
ISIM TATAMBA KURUNA
panambayan basila
bahadap lakatan bahinti
bubur putih, bubur habang
bagamatan marajah lalangitan
lawan buncu kalam bismillah
di pancung ati batajak salawat
bakicing bigi mata maucap isim
maminta kanu nang ampun-Nya
bakarimut muntung badu’a
bakuluman banyu tatamba
samburakan ka buncu-buncu alam
puah! hancap lumus bala Kuruna
nang mambulangkir banua
nang mahumbalang dunia
ui...bubuhan dangsanak
damini dikami batatamba
manulak bala Kupit-19
babarasih pitak banua
mamalas tanah banyu
mahanggus panyakit
mahaga wisa dunia
mangikih rigat dusa
musabap pungkala bala kuruna
cakada kasandangan ngangal hudah
sadunia manyandang rinyut ristanya
saduyau nusia garabakan panyawaan
saunjutan banua kumarau padaringan
ayungannya cakada burinik
bahinip mawigasakan awak
maasi pituah buhan huluagah
wayah satumbangan Pandami
hus! lakasi baugah pirus kuruna
dikami handak bahinak landang
dikami handak jua linjang lanjang
lakun panambayan wayah sigaran
tagal dimapa lamun kaputingannya
banua tahayapak, dunia tahanyanyak
nusia kujul-kujul tumbang-tumbalik
kur...sumangat...
barakat La Ilaha Illallah
Muhammadarrasulullah
mudahan ampihan bala kuruna
lakas wigas banua Banjarku
hancap waras duniaku
2020
Sumber : Maanyam Aksara Maangkat Budaya, Antologi Pemenang Lomba Cipta Puisi Bahasa Banjar & Menulis Cerita Rakyat Kalimantan Selatan, Aruh Sastra Kalimantan Selatan (ASKS) XVII Kabupaten Tabalong Tahun 2020. (Halaman 75 dan 76)
Tidak ada komentar:
Posting Komentar