Selasa, 9 Maret 2021
Sudah babarapa hari ini Dugal mancium kada nyaman, bau haruk. Siang malam, antah matan mana asalnya. Jua kada tahu apakah nintu bangkai tikus, hayam, atawa itk nang mati. Amun di dalam rumah sudah dicarinya kadada tatamu. Tahuam amun di barumahan.
Maka baunya sasain manyalingit, akibatnya inya wan kuitannya di dalam rumah kada tapi basalira makan minum. Mudahanai bau haruk nintu lakas hilang babarapa hari ka muka nia. Nyaman kada mangganggu lagi suasana kaluarga Dugal di rumah manikmati makan wan minum.
Caka sudah tahu di mana andaknya asal bau nintu, tantu Dugal lakas-lakas mambuang ka jauh. Biasanya nang rancak di rumah Dugal bangkai tikus nang imbah di makan kucing, bau haruk cagar cungul.
Tapi nang ini kamungkinan lain bangkai tikus pang. Karna baunya lawas hanyar hilang, amun tikus paling sahari dua hari, tapi ini sudah parak talu hari kada jua ampih baunya. Isuk-isuk hari Dugal cagar bajajanguk ka barumahan, mancari asal bau nintu.***
Tidak ada komentar:
Posting Komentar