Kisah Dugal : Sasain Makmur

Rabu, 6 Januari 2021

KISAH DUGAL :

 

SASAIN MAKMUR

 Oleh : Akhmad Husaini

 

Hidup kada kaya urang, sadarhana haja, malah dianggap miskin di kampungnya. Tapi Dugal tatap basukur, kawa hidup, walau pas-pasan wan saadanya haja. Wahini awak Dugal lamak pada bahari, wayah batimbang sakitar 70 kilu, napa gawian makan guring haja.

Imbah bangun guring balalu mandi, imbahitu sambahiyang Subuh di Langgar Al Kautsar Hangkinang, kada jauh pada rumah wadah inya bagana. Ada saku sa jam di Langgar Al Kautsar, imbah sambahiyang, ba wirit wan do’a. Bulik ka rumah balalu batatapas pakaian nang sudah di santak samalam.

Lalu Dugal maurus ingunan. Ada hayam, itik, balibis, angsa, wan kalkun, nang biasa disingkat Dugal lawan HIBAK. Gawian ini tamasuk mamaluhi haja ka awak baisukan hari. Mulai mangaluarkan tarnak unggas nintu matan kurungan.

Lalu mambarasihi kurungan, lapik nang sudah hibak wan tahi diganti lawan nang hanyar barupa kadut palastik. Lalu kadut nang rigat nintu dibawa ka pabanyuan, nang tunggal butingan dibasuh, tapi kada langsung dijamur, cuma dibasuh mamisah tahi pada kadut.

Tuntung itu Dugal maambil umpan, barupa BR, gabuk, wan nasi. Himung banar Dugal malihat ingunannya makan gancang di baisukan hari nintu.

Tuntung maurus tarnak HIBAK, balalu Dugal bapakaian, cagar tulak ka gawian. Inya paling sawat datang, sakitar jam tujuhan. Napa diulah sawat kaya itu? Padahal kakawanannya datang jam dalapanan atawa sambilanan. Mambuka liptup, mangatik tulisan, jua malanjutkan gawian nang samalam balum tuntung.

Bila parut asa garurukan, hanyar inyar ka warung Umanya Ica, nang andaknya di muka jumbatan, kada jauh pada kantur wadah Dugal bagawi. Dugal malihat situasi jua, bila urangnya banyak inya kaina haja, tapi bila puang inya hanyar ka warung.

Dugal tamasuk urang nang katuju rami, karna mimang inya urangnya pandiam. Kada katuju gigir atawa rami kaya pasar. Dugal malah katuju amun di warung nintu inya badua haja lawan tukang warung.

Amun kada banyak urang, ujar Dugal nyaman wan puas manikmati makanan wan minuman nang ada dihadapan. Tapi amun urangnya banyak, apalagi sasak, balalu pikiran  Dugal, kaya apa sakira salakasnya urang nang ada di warung bulikan, atawa inya saurang nang cagar capat-capat kaluar pada warung nintu.***