Si Ading Lagi Karindangan

SENIN, 5 AGUSTUS 2013

Lawas kada ba-sms-an nah....Pian sarikah wan ulun ? Amun ulun ada salah ulun minta maaf. Napa Ka kada dibalas sms ulun ? Aurkah pian. Tapi ditalipun jua kada maangkat. Sarik napa ka ? Marga nang samalamkah. Ulun kada mambalas sms pian. Samalam ulun balas tapi pas ulun kirim kada kawa takirim. Kada tahu jua marganya. HP ulun kah nang error sudah.
Ulun kada nyaman hati Ka ai amun kaya nia. Ulun kada taguring mamikirakan pian. Malam ini ulun kada tarawih. Kadatangan tamu Ka ai. Pian pang napa diulah ? Tarawih haja kalu ? Jangan kada tarawih ka lah. Tampulu bulan puasa nang datangnya satahun sakali. Ulun caka kada datang bulan ulun hakun tarawih tarus.

Ka...kanapa hati ulun tapikir anu pian tarus. Ulun karindangan tarus wan pian. Tagila-gila ujar urang. Imbah kenal wan pian dalam babarapa bulan ini ulun tabayang wajah pian tarus. Saban hari kita batamu . Tapi ulun kada dulak-dulak mamandang wajah pian. Ulun sasain bagairah bagawi. Ulun handak salalu parak pian tarus. Kita rahat diwarahakan kakawanan disakulahan. Pian badiam wan ranai. Ulun jua. Padahal dihati ulun manyatujui huhulutan nintu bahnwa ulun katuju wan pian. Mudahan kita ada juduh Ka lah.

Ka..amun pian ampih sarik wan ulun sms ulun atawa talipun lah. Ading sayang pian. Ulun maklum pian urangnya pandiam. Pain salalu marandah tarus anu ulun. Waktu ulun handak baelang ka rumah pian. Pian kada mambariakan. Alasan pian rumah buruk. Kada jua ka ai. Rumah ulun gin kada kaya urang jua. Asal kawa diganai wan ampun saurang. Cuba lihati urang nang bagana dikuntrakan ka ? Tapi antah kanapa ulun suka wan pian. Ulun katuju pian urangnya baikan. Pian katuju sambahyang tahajud wan dhuha kalu ka ?

Ka.. imbah tarawih biasanya pian tadarus kalu ?  Barapa juz sudah ? Barapa ikung nang tadarus ? Di kampung ulun kada tapi rami lagi urang tadarus. Amun ada jua nang tadarus paling kada kawa dihitung wan jari nang umpat. Itugin nang tuha-tuha. Kadada lagi remaja, wan pamuda.

Ka...dirumah ulun tinggal wan nini. Mama wan abah ulun sudah lawas maninggal. Kubur sidin ada dimuka rumah. Tiap malam Jum’at ulun bado’a wan sidin. Baisukan hanyar jarah. Ulun asa sadih waktu pian batakun anu ulun, “ Abah wan mama pian dimana?”
Ka...bujuran kah pian rancak kada taguring babarapa malam ini ? Napa marganya Ka ? jaga kasihatan ka lah? Pian katuju bagadangkah ka ? Mudahan pian kada bagadang.
Ka..ulun salalu mambaca dan mambuka tulisan di facebook wan blog pian. Rame banar mambaca tulisan pian. Handaknya ulun bisa manulis kaya pian. Tapi kada bisa. Ulun cuma katuju mambaca haja. Siapa Ka maajari sampai pian bisa manulis ? Napa ada manulis tentang ulunkah di blog pian? Mudahan jadi kanyataan maksud do’a pian kaya di blog nintu. Insya allah jadi kanyataan. Ulun bado’a satiap imbah sambahyang lima waktu kita disatuakan.

Ka...Malam Rabu kaena di Amuntai ada acara batanglong  ujar kawan ulun. Tulak kah pian Ka ? Caka ulun dibariakan nini ulun handak banar malihat. Tapi kada papa jua kada malihat. Mungkin pian tulak. Ulun mambaca di blog pian haja kaena habar wan gambarnya.
Ka..pabila pulang kita bajalanan ka Loksado. Ulun masih taingat waktu pian bawai bajalanan ka Loksado saminggu sabalum bulan puasa tadi. Pian mambawa ulun ka Air Terjun Haratai. Lalu ka Malaris ka Riam Barajang dan Riam Hanai. Jua ka Tugu Niih. Saharian kita ka Loksado. Tulak jam 09.00 bulik parak jam anam. Kaya biasa bila bajalanan jauh pian bawa tas. Napakah isinya ? Sabuting nang kada tatinggal pian salalu bawa kamera. Pian mambawa ulun jalan Ambarai lalu ka Madang. Singgah satumat di Benteng Madang. Pas kadada urang. Kita baduaan haja. Alhamdulillah kada apa-apa. Pian ulun akui tamasuk lalakian tahan iman. Sakadar manjapai tangan ulun haja pian kada hakun. Ulun salut wan pian. 

Kada lawas di Benteng Madang kita tarus. Belok ka Mandapai sampai malanjutakan parjalanan manuju Loksado. Kita sawat singgah di Loksado batutukar minuman ringan dan snack gasan parsadian waktu di tampat nang kita tuju. Pian manukar Teb’s. Katuju banarlah pian Teb’s Ka ?

Parjalanan kita lalui. Sasakali kita singgah di jalan bila asa uyuh. Walaupun kita basapida mutur ka Haratai tapi tanjakan dan turunan nang curam sadikit manguras tanaga ekstra. Hari itu kada haja kita nang ada di Haratai. Tapi sakitar puluhan urang. Buhannya jua bapasangan kaya kita. Kada anak muda haja. Tapi jua nang tuha pada kita. Mungkin sudah suami isteri. Jadi kita kada laluasa manikmati Air Terjun Haratai hari itu. Tapi tatap haja kita turun ka situ. Parjalanan jauh harus dibalas dengan malapas panat dan uyuh. 

Sabalumnya kita dudukan di gazebo nang ada kada jauh pada air terjun. Sasakali pian maabadiakan momen itu lawan kudakan pian. Kita duduk batatai sambil manikmati makanan dan minuman ringan nang kita bawa tadi. Salain kita ada jua babarapa urang nang santai di gazebo nintu. Ulun manawari buhannya. Sasakali kita bapanderan lawan buhannya agar suasana cair. Waktu kita takuni buhannya datang dari macam-macam daerah. Ada nang matan Rantau, Amuntai, wan Barabai. Ada matan Kandangan jua.

    Ka....parak jam satu sudah ari. Kada karasaan. Ulun handak guring ka lah. Mangantuk sudah. Kaena jam ampat bangun basahur. Karena nasi sudah ada dipamanas. Iwak di kulkas. Jadi kaena bangun tinggal manyiapakan haja. Kada bamasak lagi.
    Ka....ulun guringlah. Assalammu’alaikum Wr. Wb.

Kandangan, 27-07-2013