Selasa, 13 Oktober 2020
UYUH JUA PANG BUJURAN AMUN TARASAI
Ulahan : Akhmad Husaini
Sangkira kawa mamaham maksut wan tujuan
supaya kada cagar taulang lagi waktu nintu
caka tahu lawas dihakuni tumatan dahulu
kada tapi ngalih manjalani kaya wahini
bulang bulik undur mara kada tarasa
Uyuh jua pang bujuran amun tarasai
calungap sandukan dipadahakan urang
amun kada bujur manangguh himung
rancak jua ai rasa kada nyaman cangul
Asa lawas banar hanyar tuntung
tahu jua lawan kaadaan nang ada
kaina cagar taulang hilangan urang
Amun handak bapadah jangan baranaian
tatuyuk maksut hati banyak kahandak
amun sudah marasa muyak bamandak
jangan tapi dipaksaakan digawi tarus haja
Rancak sudah maalami kaya itu
pangalaman baharga saumur hidup
ada pang diri marasa kada nyaman
katuju badiam mandangarakan haja
kada tapi pangalihan kaya urang
Amun hakun bangangal nyata kahandak
nang ditakutanakan amun kada dihayut-hayut
kada kasintakan hinak marasa pina barabut
maraha lumbus asal bahagia tarus itu kahandak
Hangkinang, 24 Siptimbir 2020
Tidak ada komentar:
Posting Komentar