Kisah Dugal : Musim Kasturi

Kamis, 12 Maret 2020

Rami urang bajual kasturi di pinggir jalan, satiap kali Dugal basapida mutur, bajalanan ampah ka Kandangan atau dairah lain. Karna mimang wayahini sudah musimnya. Mangga has Kalimantan ujar urang. Karna bantuknya halus, kada kaya mangga nang di Jawa masi.

Dugal kaingatan bahari waktu masih kakanakan. Manjatu kasturi saban hari, baik Subuh, baisukan, siang, kamarian wan malam. Hasilnya dimakan saurang atawa dijual. Wayahini kada lagi. Karna inya kulir mandatangi rapunnya. Labih baik manukar anu urang nang ada di pinggir jalan.

Kasturi itu rata-rata jatuan. Kada mungkin manjuluk atawa mamutik di rapunnya langsung. Amun manjatu nang ruruh, urang nang baisi rapun kasturi baduhara manunggui, maulah rampa husus bamalam gasan manjaga kasturi nintu kalu tadahulu urang. Amun mamakan kasturi tahan bapuluh-puluh bigi. Inya baduhara duduk, siapakan lading, wadah kuyakan kasturi.

Sapalastik inya manukar lalu di bawa ka rumah dimakan saurangan. Nang kada dikatujuinya amun kasturi nintu bapira. Tapi jarang inya manamui, dalam sapuluh bigi paling sabigi nang bapira. Ada rasa bangga, Banua baisi buah has, nang sudah jadi ciri has Banua, bahkan jadi maskut tanaman salain maskut binatangnya Bakantan.

Kasturi tumbuh mamarluakan waktu nang lawas, bisa puluhan tahun bahkan ratusan tahun. Jadi jangan sampai ditabang, kayunya gasan bangunan. Ada upaya malastariakan tanaman has Banua nintu, supaya ganarasi mandatang masih kawa manikmati. (ahu)