Dugal kada cagar malupaakan
pangalamannya, makan nasi kuning Batu Piring baisukan Jumahat, nang dilayani
acil bungas langkar bangaran Acil Indaliyut (ini ngaran ulahan Dugal haja).
Jumahat baisukan sakitar jam 6 buhan Dugal
bulikan matan Tanjung. Karna malam Jumahat ada acara di Tanjung Expo Center,
Gelar Budaya Sarabakawa Tahun 2019 dalam rangka Hari Jadi ke – 54 Kabupaten
Tabalong.
Baisukan nintu di dalam mutur, matan Tanjung
maitihi di pinggir jalan bilang kada ada warung makan nang kaya di Kandangan. Hanyar
di Balangan tatamui wawarung gasan makan baisukan. Buhan Dugal singgah di Paringin,
pasnya di subarang SDN Batu Piring.
Ada wawarung nang banyak banar urangnya.
Walau bangunannya halus haja. Tapi kada sing rantian urang datang. Disitu ada
urang bajual nasi kuning. Ada nang handak manukar nasi kuning baik makan di tampat
atawa handak dibawa bulik.
Duduk di bangku Dugal mamasan nasi
kuning baiwak hati. Samantara nang lain mamasan nasi kuning iwak tauman wan
hintalu. Banyunya tih manis hangat. Napa bidanya lawan nasi kuning nang biasa
inya rasai. Sual nasinya biasa haja, tapi nang babida urang nang malayani ramah
banar.
Dugal maambil sambal acan, balalu
maandak ka piring nasi kuning dihadapannya. Jua ditambahi lawan karupuk. Ada
saku saparapat jam Digal mahabisakan nasi kuning nintu. Imbah tuntung buhan
Dugal bulikan baampah ka Hangkinang, nang bajarak sakitar 50 pal lagi. (ahu)
Tidak ada komentar:
Posting Komentar