Dugal nintu nurmal jua kaya lalakian
lain, katuju lawan binian, apalagi amun nang bungas wan manis. Hidup Dugal nang
saraba tabatas. Maksudnya pandidikan kada tinggi, kada paduitan, wll. Hidup
sadarhana napa adanya, inya jalani. Walau kaya itu, Dugal bausaha hidup
bahagia, wan himung dijalani.
Dugal amun napa dihandaki, inya bausaha
mancapainya. Misalnya di sakulahan waktu bagawi, banyak kawan guru nang bungas-bungas.
Inya bausaha mandapatakan parhatian guru bibinian nintu.
Tanyata guru bibinian nang dimaksut
cagar manuruti napa ujar Dugal. Tapi Dugal kada atas durungan napsu. Sahibar
mahimungi hati, mangabulakan hajat. Baisukan nintu Dugal handak bapandiran lawan
saikung guru, sidin ti sudah balaki wan baisi dua ikung anak. Di sakulahan
Dugal, guru nintu baisi jabatan tinggi.
Tapi hal nintu kada jadi pikiran Dugal.
Napa nang dikahandaki harus jadi nyata, itu sudah jadi tikat kuat Dugal. Kada
ngalih mambawai guru bungas nintu, ka kantin. Di sana Dugal mamasan tih is, wan
nasi bungkus, jua babarapa buting wadai.
“Ulun minum tih haja, sudah makan di
rumah, tarus ha pian makan, ulun mangawani pian sampai tuntung,” ujar guru nang
ramah nintu.
Di kantin salain Dugal wan guru bungas
nintu, ada jua panjaga kantin, jadi batalu. Ada saku sa jam Dugal bapandiran
akrap banar, wadah curhat masing-masing diri. (ahu)
Tidak ada komentar:
Posting Komentar