Tampulu ada di Tanah Bumbu, Dugal
bapuas-puas manikmati Pantai Pagatan. Talu hari ada disana, talu kali jua inya
ka Pantai Pagatan, tarutama waktu kamarian, parak sanja.
Jarak rumah wadah bamalam sakitar sa pal
satangah. Inya bajalan batis lawan kawannya. Di pantai banyak urang, baik
lalakian atawa bibinian, kakanakan atawa nang tuha.
Biasanya pangunjung nang datang handak
bagambar lawan kamira hapi. Salain itu kawa manikmati pamandangan alam has
pasisir laut. Buhan Dugal bajalan manyusuri pinggir pantai.
Salain karangan nang putih, ada jua
cangkang bakas binatang laut tadampar di pinggir pantai nintu. Nang manarik
parhatian Dugal adalah ada babarapa bigi katungkang.
Kada di kampung Dugal haja, sakalinya di
Pagatan Dugal ada jua tatamui katungkang. Mimang pantai ciri hasnya adalah
rapun nyiur, tapi di parak Dugal asa kadada talihat rapun nyiur.
Kamungkinan katungkang nintu datang
dibawa larut ulih banyu laut. Kada pati tahu asalnya matan mana katungkang
nintu.
Dugal asa panasaran, diambilnya sabigi
katungkang, lalu dijumputnya napa nang ada di dalam katungkang nintu. Kalinya
ada kartas batulisan.
"Buhan pian waktu tulak kasini di
dalam bis mamandir ulun haja, jadi ulun karindangan wan buhan pian, ulun ini
katungkang Pagatan."
Kaya itulah bunyi tulisan di kartas nang
diambil matan katungkang tadi. Harau lihum bapair Dugal imbah mambacanya. (ahu)
Tidak ada komentar:
Posting Komentar