Dua ikung anak ayam kampung ampun Dugal
nang hanyar mamacah hilang. Dari anam ikung jadi ampat ikung haja lagi. Ada saikung
kucing kuyangan babalang talu nang manjadi panyababnya.
Kucing nintu sudah maincar tumatan jauh.
Waktu kuitan hayam lingah, anak hayam nintu balalu dihantupnya. Warna anak
hayam nang hilang ada kuning wan putih. Dugal kada tahu matan mana datangnya
kucing nintu. Inya malihat sakilas haja tumatan kaca rumahnya.
Kucing intu mahantup anak hayam balalu
bukah ampah ka hulu. Kuciak-kuciak anak hayam nintu. Hayam nang lain umpat gigir.
Balalu Dugal kaluar rumah, handak mamasukakan hayam nang lain ka kandang.
Kucing kuyangan istilah kucing nang katuju
makan daging, masih hidup mahluk nang dimakannya. Jarang kucing kuyangan ada
wayahini, tapi sakali ada, anak hayam cagar banyak nang hilang kada basisa.
Mudahan haja sisa ampat ikung anak hayam
Dugal, kada lagi dimakan ulih kucing kuyangan nintu. Lakas ganal, nyaman jua
gasan diingun, bisa dinikmati gasan makan atawa bisa jua dijual. (ahu)
Tidak ada komentar:
Posting Komentar