Saban kali bajalanan ka Kabupatin Balangan, Dugal
manyampatakan singgah di warung Acil Suna nang ada di Paringin. Warung Acil
Suna kaya warung biasa jua, kaya nang ada di Hangkinang umumnya. Warung nang
batajak di muka rumah. Tapi warung nintu payu banar.
Acil Suna sudah bakaluarga. Lakinya urang Kalua.
Baisi talu ikung anak, nang pahalusnya bibinian kalas dua Madrasah Ibtidaiyah,
nang panangah lalakian kalas talu Tsanawiyah, nang panuhanya bibinian tuntung
sakulah Aliyah malanjutakan kuliah di Amuntai.
Warung Acil Suna andaknya pas banar di pinggir
jalan nasiunal. Karna rancak ka Balangan Dugal tarahati jua singgah ka warung
Acil Suna. Jadi Dugal akrab banar wan Acil Suna. Sual umur Acil Suna tatuha pang
pada Dugal babarapa tahun.
Tapi Acil Suna pina masih anum haja, kaya bibinian
umur dua puluhan haja. Urangnya liwar bungas wang ramah-tamah. Imbah bapandiran
hanyar Dugal tahu, tanyata Acil Suna katuju jua bakasanian. Bahari waktu masih sakulah
Aliyah sidin rancak umpat lumba mawakili sakulahan.
Kaya lumba bakisah wan mambaca puisi. Sidin harat
jua baulah puisi wan cerpen. Jadi pas banar Dugal bapandiran wan Acil Suna bila
tatamu, sual sastra manyastra. Jua sual parkambangan kasanian wayahini nang ada
di Balangan.
Dugal bila ka warung Acil Suna salalu mamasan
tih is. Lalu wadai kasukaannya amun kada guguduh pisang manurun wan ruti pisang,
maambil nasi bungkus has Balangan. Karna sudah taminun banyu Acil Suna,
maksudnya minum tih is, Dugal salalu karindangan datang ka warung Acil Suna. Banyunya
matan sungai Balangan nang mamikat hati. Liwar banar Dugal nia. (ahu)
Tidak ada komentar:
Posting Komentar