Dugal bahanu muar malihat ada anak muridnya di sakulahan
wadah inya bagawi, malalain pada urang. Bakalakuan sakahandak hati, ngalih
ditagur, wan katuju bagaya pas balajar. Walau kada jadi guru hanya pagawai Tata
Usaha haja, tapi Dugal tatap baisi rasa tanggung jawab malihat ada muridnya di sakulahan
nang malanggar tata tartib sakulahan.
Ada saikung murid nang liwar macalnya. Pindahan
sakulahan lain. Ujar habar inya pindah marga bamasalah di sakulahan tadahulu.
Walau bagitu sakulahan Dugal tatap manarima murid nintu tapi sudah ada
parjanjian lawan kaluarganya.
Apabila malakuakan kasalahan atawa malanggar
tata tartib cagar dibari hukuman, nang tabarat tantu dikaluarakan pada
sakulahan. Labih baik mambuang saikung dari pada ratusan nang lain taumpat jua.
Dugal katuju banar mambarak kakanakan nang tuntung
istirahat manuju kalas masing-masing. Inya sarik bila ada pangumuman liwat mik
bahwa istirahat sudah tuntung mamasuki jam barikutnya.
Tapi masih haja ada murid nang basantai di
warung atawa tampat lain. Padahal buhan guru sudah masukan ka dalam kalas.
Dugal bahanu bakuriak nyaring sambil mambarak muridnya masuk ka kalas
masing-masing. (ahu)
Tidak ada komentar:
Posting Komentar