Tampulu ada di Hangkinang, imbah Isya Dugal
bakumpulan lawan kawannya di gardu pus runda. Macam-macam nang dipandir sambil malihat
tipi wan badumlah. Dalam babarapa minggu ini Dugal kada talihat di kampung.
Tarancaki inya bajalanan ka Kabupatin Balangan
karna ada paruyik panulisan buku. Lalu Dugal bausaha mancari pangalaman manarik
wan kagiatan masarakat nang ada disana. Inya waktu singgah di parbatasan
Kacamatan Juai wan Kacamatan Awayan sampat disasahi urang gila atawa kurang
ingatan.
Urang itu hanya basalawar handap kada babaaju.
Ujar urang kampung urang itu baumpat bila pas bubulanannya, siapa haja nang
tatamu pasti disasahinya. Pas kabalujuran Dugal wan kawannya singgah di tuku
ada nang ditukar, kada jauh pada urang gila itu bagana.
Pas Dugal tuntung baulanja di tuku, urang gila
nintu mandatanginya. Lalu maamuk, untung haja sapida mutur sudah hidup. Lalu
Dugal mangalunyur, tapi urang itu tatap manyasahi, Dugal sasain kuat mamutar satang
sapida mutur.
Untung haja urang kurang ingatan nintu, jauh
banar sudah diliwati. Dugal wan kawannya bamandak di jumbatan. Maatur hinak
babarapa waktu. Kada biasa kaya ini Dugal disasahi urang kurang waras, nang
kada bamasalah apa-apa sabalumnya. Pangalaman nang kada kawa dilupaakan ulih
Dugal saumur hidupnya. (ahu)
Tidak ada komentar:
Posting Komentar