Dugal lawan kawannya, Undat bakuliling Banua
di hari Ahad. Naik sapida mutur tulak mulai rumah pukul dalapan. Ada saku
ratusan pal inya jalani hari itu. Mulai rumah manuju ampah ka Nagara (Hulu Sungai
Selatan), tarus ka Babirik, Muara Tapus, wan Amuntai (Hulu Sungai Utara).
Sambahiyang Juhur di Masjid Raya Amuntai.
Makan siang di warung makan itik ampah ka Candi Agung. Imbahitu inya tarus ka
Kelua, Tanjung (Tabalong), lalu ka Paringin (Balangan), ka Birayang wan Barabai
(Hulu Sungai Tengah). Bulik ka rumah imbah Isya.
Urang tantu maanggap kagiatan Dugal ini
hanya buang-buang binsin wan waktu haja. Tapi ujar Dugal itu rami. Banyak hal nang
hanyar didapatakan. Jua manambah wawasan. Manyusuri alam nang dibari Allah SWT.
Dunia ini tanyata kada saluas daun tarap.
Satiap masuk waktu sambahiyang Dugal singgah
dimana ada masigit atawa langgar. Jua
satiap ada urang bapintaan di jalan gasan tampat ibadah, Dugal manimbai
duit. Jua Dugal manaraktir kawan sapanjang waktu mulai tulak sampai bulikan.
Dugal katuju mambaca surat kabar, jadi
inya satiap ada waktu ka pasar, manukar surat kabar. Surat kabar nang
ditukarnya kaya Banjarmasin Post, Metro Banjar, Kompas, Radar Banjarmasin,
Media Kalimantan, Kalimantan Post, wan lain-lain.
Lima kabupatin di Banua di hari Ahad sudah
dikulilingi ulih Dugal. Kaina inya punya rancana handak ka Kaltim, Kalteng wan
Kalbar basapida mutur haja. Karna Dugal urangnya katuju bajalanan wan kagiatan
nang manantang. (ahu)
Tidak ada komentar:
Posting Komentar