Balalah Ampah ka Barabai

Sabtu, 21 Januari 2017

Kamarian Sabtu Dugal balalah saurangan ampah ka Barabai. Rancananya inya bulik malam. Naik sapida mutur mulai rumah manuju Barabai jaraknya sakitar 30 pal.

Itu dijalaninya lawan waktu sakitar 45 manit. Inya kada ka kuta Barabainya, tapi ampah ka Birayang. Mulai Barabai ka Birayang sakitar 12 pal. Disana inya ada baisi kawan akrab bangaran Hariadi.

Waktu sampai di rumah kawannya  di kampung Labung Anak, tanyata kawannya kadada di rumah. Ujar tatangganya ada urusan ka Barabai. Jadi Dugal tasalisih, caka ditalipun badahulu bisa tatamu. Laluai Dugal bajalanan ka lain.

Di simpangan ampah Birayang Dugal tatamu kawannya bibinian, nang bangaran Galuh Maida, urang Pantai Hambawang. Lawan Galuh Maida ti Dugal manuju ka Limpasu, handak manikmati jus, Galuh Maida hakun dibawai.

Galuh Maida itu guru Bahasa Indonesia di sabuah Madrasah Aliyah. Akrab lawan Dugal marga sama-sama sahubi, katuju manulis. Urangnya liwar baikan, palihuman, wan lakas akrab. Rancak nang badua nintu bapisbukan.

Di Warung Jus Limpasu Dugal wan Galuh Maida mamasan jus kasukaan. Dugal mamasan jus wortel samantara Galuh Maida jus melon. Buhannya jua mamasan ruti bakar rasa kanas. Sakitar sajam di warung jus nintu buhan Dugal malajuntakan parjalanan.

Dugal wan Galuh Maida baampah ka Bendungan Batang Alai nang ada di Labuhan parak Batu Tangga. Jaraknya sakitar 10 pal pada rumah kawannya. Kamarian rami urang di Bendungan Batang Alai.

Imbah mamarkir sapida mutur. Bujur jua ai banyak sapida mutur baparkir. Kada anak muda haja, nang tuha gin ada jua lawan anaknya. Lalu Dugal mangudak suasana tarsabut lawan kamira hapinya. Sakitar satangah jam baada disana Dugal wan Galuh Maida babulik ampah ka Birayang.

Ari parak sanja, Dugal wan Galuh Maida singgah di Masjid Mubarak Birayang, nang jaraknya sakitar satangah pal pada Pasar Birayang. Buhannya sambahiyang Mahgrib. Tuntung sambahiyang Maghrib, Dugal wan Gauh Maida bulik ampah ka Barabai.

Singkat kisah, Dugal wan Galuh Maida singgah di Masjid Agung Riadhusshalihin Barabai manunaikan sambahiyang Isya. Imbah sambahiyang Isya buhannya ka  sabuah rumah makan parak Pasar Barabai. Imbahitu mamarkir sapida mutur inya bakuliling Pasar Barabai. Rami urangnya, karna pas  malam Minggu.

Kaya biasa bila ka Pasar Barabai Dugal singgah di Toko Obat Ikhtiar, inya manukar obat Asonfen wan Ifasma. Dugal baaritan asma, jadi ubat nintu gasan bajaga-jaga kalu asmanya baumpat. Imbah nukar ubat inya mancari urang bajual salawar panjang hirang, gasan dipakai ka tampat bagawi.

Salain itu inya manukar baju muslim wan tapih. Imbah itu Dugal wan Galuh Maida bulikan. Galuh Maida singgah di Pantai Hambawang. Samantara Dugal tarus ampah ka Kandangan, nang jaraknya 30 pal lagi, sampai di rumah sakitar pukul 11 malam. (ahu)