Kada bujur ujar lagu, labih baik sakit
gigi dari pada sakit hati. Manurut Dugal kaduanya kada nang nyamannya. Sudah
talu hari ini Dugal kada karuan rasa marga sakit gigi ini.
Giginya sakit, marinyut banar. Jadi mangganggu
lawan gawian. Dugal urangnya paling takutan amun basuntik. Gasan maampihi sakit
gigi ini Dugal mauntal ubat haja. Inya sudah mauntal banyak ubat, tapi kada
sing ampihan jua.
Inya manukar Obsagi di Tuku Yadi nang
ada di subarang wadah inya bagawi. Bapuluh-puluh bungkus saku Duga mauntal
sampai wayahini, ampihnya wayah mauntal haja, kada lawas imbahitu marinyut
pulang.
Waktu takumpul di gardu pus runda,
kawannya banyak nang mambari saran napa cara gasan maampihi sakit gigi nintu.
Undat manyuruh Dugal bakukumur banyu
uyah. Lalu Gabau manyuruh bakukumur banyu jarangan daun sirih.
Kacit manyuruh mamakan antalgin wan
ampisilin. Paampihan Raji manyuruh mancatuk lintuhut wan tukul. Imbah mandangar
kaya itu Dugal bulik ka rumah.
Barataan digawinya. Tinggal lagi suruhan
Raji mancatuk lintuhut lawan tukul. Handak guring balalu manggawi suruhan Raji
nintu, tuk lintuhut saurang dicatuk Dugal wan tukul.
Dugal kasakitan. Kada lawas bujuran giginya
ampih sakit, tapi baturun ka lintuhut pulang nang sakit. Dasar Dugal nih, gigi
sakit lintuhut dicatuk lawan tukul. Nah iya pang baubah pulang aritan, mantuk
sakit gigi ka sakit lintuhut. (akhmad husaini)
Tidak ada komentar:
Posting Komentar