Di sakulahan wadah Dugal rami kakanakan
baulah mading atawa majalah dinding. Saikung kakanakan diwajibakan sabuah
karya, bisa diulah di rumah, lalu bila tuntung dikumpul ka wali kalas.
Karya nang diulah barupa cerpen, puisi,
kata-kata mutiara, lukisan, wan nang lainnya. Ada dua papan mading di sakulahan
Dugal nintu. Buhan kakanakan cukup basamangat maisi lawan karyanya.
Utuh Indut, anak Dugal, nang sakulah
sama di wadah Dugal bagawi, waktu di rumah bapadah anu umanya, Aluh Lantih.
“Ulun handak inta ulahakan mading,” ujar
Utuh Indut.
Lalu Aluh Lantih mamadahakan anu Dugal,
anaknya handak inta ulahakan mading. Lalu Dugal maulahakan mading anu anaknya
Utuh Indut.
Singkat kisah, imbah tuntung Utuh Indut
kada hakun. “Napa ngalih-ngalih abah maulahakan mading, maka kada hakun,” ujar
Dugal sarik anu anaknya.
“Anu Bah ai ulun kada handak mading
nintu,” ujar Utuh Indut.
“Lalu mading napa nang ikam maksud,”
takun Dugal.
“Maksud ulun mading itu ti singkatan
Maulahakan Ading. Nyaman ulun kada kasaurangan lagi di rumah,” ujar Utuh Indut.
Mandangar kaya itu Dugal lihum,
tapakalah ulih anaknya. “Ayuha, baranainya, kada disuruh gin abah bisa haja,”
ujar Dugal sambil manyirit anu bininya, handak mambawai. (ahu)
Tidak ada komentar:
Posting Komentar