Hari Ahad samalam Dugal bailang anu kawannya di
Kacamatan Juai, Kabupatin Balangan.
Jarak Juai sakitar 60 pal pada rumah Dugal di Hangkinang. Amun tumatan Paringin
ka Juai sakitar 20 pal haja. Dugal
katuju bajalanan ka Balangan dalam babarapa bulan ini.
Karna inya ada paruyik panulisan saputar Balangan
gasan di blognya wan cagar dibukuakan. Kacamatan Juai takanal lawan waluh.
Sampai-sampai disana ada batajak Tugu Waluh, sabagai tanda ciri has dairah nintu.
Banyak nang dirasa ulih Dugal salama baada disana.
Dibawa kawannya ka tampat wisata nang ada
disana. Jua dibawa ka wawarung. Macam-macam
wadai atawa makanan has, nang babida pada di Hangkinang. Dugal malihat
sakaligus marasai pais waluh, guguduh waluh, apam waluh, karupuk waluh, dsb.
Tampulu baada di Juai, hantup tarus ujar Dugal.
Tangah hari, di rumah kawannya, waktu makanan
disurungi lawan gangan waluh. Hanyar tarasa Dugal saraba waluh makanan atawa
wadai. Karna inya mimang baada di dairah panghasil waluh.
Buliknya Dugal disangui babarapa bigi waluh
nang ganal-ganal. Bamingu-minggu waluh itu hanyar habis. Salain gasan dimakan
saurang, sapalih dibariakan anu kula wan tatangga parak rumahnya. (ahu)
Tidak ada komentar:
Posting Komentar