Dugal baduhara bamalam di rumah warga di
Lampihong, Kabupatin Balangan malam Ahad samalam. Gasan malihat parusis urang
maulah gula habang, karna Kacamatan Lampihong dikanal sabagai dairah panghasil
gula habang. Sampai ada Tugu Gula Habang. Dugal bapadah anu Pambakal disana,
gasan bamalam di rumah warga nang bangaran Utuh Duhak nang baumur sakitar 50
tahun.
Di rumah salain sidin ada jua bininya wan dua
anaknya. Dugal bapadah anu Utuh Duhak maksut rancananya itu. Utuh Duhak katuju
haja diilangi sakaligus bamalam. Hasil tulisan lawan gambar cagar diandak Dugal
di blog wan dibukuakan. Baisukan sawat Dugal malihat Utuh Duhak mambawa batang
haur batatak nang cagar digunaakan maisi
banyu laang.
Utuh Duhak bajalan sakitar sa pal manuju
babarapa rapun hanau. Utuh Duhak tinggal maambil batang haur nang sudah baisi
banyu laang. Karna sabalumnya sudah diandak samalaman. Lalu Utuh Duhak babulik
ka rumah. Di balakang rumah ada padapuran husus gasan maulah gula habang. Banyu
laang dimasukakan ka dalam kawah. Ada waktu babarapa jam sampai banyu laang
baubah jadi likat.
Imbahitu kawah dibangkit, banyu laang tadi
dimasukakan ka dalam citakan husus matan ulin. Imbah itu didiamakan salama
babarapa jam. Kada lawas dikuit. Lalu dibungkus lawan kararas pisang, lalu siap
dipasarakan. Asa puas Dugal kawa malihat parusis mambuat gula habang di
Lampihong. Waktu handak bulik Dugal disangui Utuk Duhak babarapa biji gula
habang. (ahu)
Tidak ada komentar:
Posting Komentar