Bulihlah Mamandir Urang di Bulan Puasa

Jumat, 25 Mei 2018

Ghibah atawa gibah menurut kamus ganal Bahasa Indunisia adalah mambicaraakan / mamandir kaburukan urang lain. Marupaakan sabuting tindakan tarcala nang kada dibulihakan dalam agama Islam, baik nintu dalam kundisi wayah puasa atawa kada waktu bapuasa. Urang nang malakuakan ghibah diibaratakan kaya urang nang mamakan bangkai dangsanaknya. Bakaitan lawan ghibah pada waktu manjalanakan ibadah puasa, tadapat babarapa hadis nang manjalasakannya, yaitu:

 “Banyak banar urang nang puasa, inya kada mandapatakan apa-apa matan puasanya kacuali rasa lapar.” (HR: Ibnu Majah)

Al-Ghazali sabagaimana dikutip ulih al-Minawi bakumantar takait hadis nia. Hadis nia adalah ungkapan gasan urang nang manggawi puasa namun inya babuka lawan sasuatu nang haram atawa babuka mamakan daging dangsanaknyanya (ghibah), urang nang kaya ini ini adalah urang nang bapuasa wan kada mampu manjaga angguta awaknya gasan manjauhi parbuatan dusa. Labih lanjut al-Minawi manjalasakan, “kacuali rasa lapar” manunjukakan bahwa inya kada lagi baulih pahala matan Allah SWT, puasanya kada ditarima lagi, akan tatapi inya kada parlu mangganti puasanya.

 “Barangsiapa nang kada kawa maninggalakan pandiran karamput, wan malakuakan parbuatan karamput, maka Allah kada mamarluakan lagi inya maninggalakan makanan wan minumannya (puasanya).” (HR: Al-Bukhari)

Hadis ini sabagaimana nang dijalasakan ulih Ibn Baththal dalam Syarh Shahih al-Bukhari manunjukakan bahwa puasa adalah manahan diri matan pandiran nang kada baik wan bakaramput, sabagaimana sasaurang manahan diri matan makan wan minum. Amun urang nang bapuasa kada manahan diri matan pandiran nang kada baik  wan bakaramput, maka nilai puasanya bakurang, dimuari ulih Allah SWT wan kada ditarima puasanya.

Pandapat lain mamadahakan bahwa nang dimaksud kada baarti bahwa puasa nang inya gawi batal, radaksi di atas hanya manunjukakan tahdir atawa paringatan gasan urang-urang nang babuat kaya itu pada bulan puasa. Inya kada parlu mambatalakan puasanya wan mangganti puasanya di kamudian hari.

Pandapat ini, sabagaimana disambat ulih an-Nawawi dalam al-Majmu’ Syarh al-Muhadzdzab didukung ulih Imam Syafi’I, Malik, Abu Hanifah, Ahmad bin Hanbal wan hampir saluruh ulama kacuali al-Auza’i, manurutnya sasaurang nang mamandir urang atawa malakuakan ghibah di tangah-tangah manjalanakan puasa, maka ibadahnya batal dan inya harus mangganti puasanya di waktu nang lain.

Dalam riwayat lain tadapat tambahan kata al-jahl, radaksi al-jahl di dalam rangkaian hadis di atas maindikasiakan saluruh parbuatan maksiat. Radaksi ini ada pada riwayat al-Bukhari dalam kitab Adabul Mufrad, an-Nasa’i, Ibnu Hibban wan Ibnu Majah. Amun kaya itu maka, ghibah wan barataan parbuatan maksiat lainnya pada dasarnya mampu mangurangi atawa bahkan mahilangakan pahala puasa.

Jika dalam kundisi kada puasa haja dilarang babuat ghibah, mancala urang lain, pandir bakaramput, maka hal nintu labih ditakanakan lagi supaya ditinggalakan haja ulih urang nang manjalanakan ibadah puasa, walaupun di dalam mazhab as-Syafi’i sabagaimana nang sudah disambatakan di atas amun sasaurang babuat ghibah waktu manjalanakan puasa, maka inya sudah babuat maksiat, namun hal itu kada mambatalakan puasanya. (ahu)