Sabtu, 29 Mei 2021
Dalam pikiran Dugal amun disambat Pagatan, nang ada dalam pikirannya adalah aruh atawa pista laut Mappanretasi nang diadaakan suku Bugis Pagatan saban bulan April tiap tahunnya.
Aruh Sastra Kalimantan Selatan (ASKS) XVI Tahun 2019 sudah lawas tuntung. Tapi Pagatan masih tatap ada dalam pikiran Dugal. Buhan rumbungan Dugal bamalam di rumah warga Pagatan nang sudah disiapakan ulih buhan panitia.
Sawat haja Dugal, Amang Iwan, Acil Suna wan Acil Ipa bajalanan ka pasar. Ada sakitar sa pal saku pada rumah buhannya bamalam. Imbah matan pasar ka Pantai Pagatan. Di pantai manyaksiakan urang nang malihat suasana pantai wan laut. Ada nang mancangangi matahari tinggalam.
Talihat mataharinya bagus banar. Puas di pantai, buhannya bulikan ka panginapan, kabalujuran ari sudah sanja. Suasana malam di Pagatan.
Dugal saumur hidup hanya babarapa kali haja ka Pagatan. Hanyar ini saja ada waktu ka pantainya. Waktu ASKS tahun 2018 di Kutabaru, buliknnya buhan Dugal sampat singgah di warung nang parak Lapangan 7 Februari Pagatan.
Pas waktu nintu warung nang buhannya datangi kana musibah kamandahan atawa kabakaran. Wayahini warungnya sudah baik pulang, satahunan pang sudah kajadiannya. Pagatan salalu dalam kanangan kada suah dilupaakan saumuran. (ahu)
Tidak ada komentar:
Posting Komentar