Sudah talu hari ini Dugal maarit galau. Gasan
mangurangi galau, malam tadi inya bakumpulan wan kawannya di gardu pus runda
kampung wadah inya bagana. Imbah Isya takumpulan sudah disana. Ada nang malihat
tipi umum, bacatur wan main dumlah.
Dugal nang biasa suka main catur atawa
badumlah, malam itu inya hanya malihat tipi haja. Ranai kaya siput dipais.
Malihat kaya itu dua kawan akrabnya, Undat wan Gabau managur. Kanapa mati kaya
itu kawannya itu. Laluai Dugal manjawab karna masalah bibinian. Nang dikanalnya
liwat pisbuk, urang kabupatin tatangga.
Waktu di pisbuk pina akrab banar ujar
Dugal. Tapi wayah didatangi langsung ulih Dugal ka kampungnya, bibinian nang hanyar
balu mantuk bapisahan lawan lakinya itu, bapadah aur banar di wadah gawian, jadi
kada kawa ditamui.
Pina akrab di dunia maya tapi di dunia
nyata malah kada tahu manahu. Padahal Dugal sudah baduhara banar datang ka wadah
bibinian nang baisi anak dua nintu. Inya mambawaakan ulih-ulih has kampungnya.
Tapi sakali datang kada dilayani. Bapala
ujar Dugal nih. Imbah itu tadi Dugal lalu pina galau haja. Kada tapi bagairah
lagi. Ampih inya bapisbukan, hapi andruid dihampasnya, imbah hancur lalu dibanamnya
ka api.
Dugal mulai mangurangi hal-hal nang bahubungan
wan intirnit. Lalu Gabau wan Undat manasihati anu Dugal, mudahan ada hikmah
dari masalah nang inya hadapi itu. Banyak badoa mudahan ada jalan lain, nang
labih baik pada itu. (ahu)
Tidak ada komentar:
Posting Komentar