Hari Ahad tadi, tampulu libur, Dugal
lawan kawannya bajalanan ampah ka Balanagan. Jaraknya sakitar 60 pal pada rumah
Dugal. Dugal basapida mutur lawan kawannya ka sana. Tulakan sakitar jam dalapan
pada rumah, sambil balarut.
Inya ka Balangan karna ada tujuan, yakni
mandatangi babarapa kacamatan nang ada disana, dalam rangka paruyik maulah buku
saputar Kabupatin Balangan. Kacamatan nang didatangi adalah Batu Mandi, Paringin,
Paringin Selatan, Juai, Halong, Lampihong, Awayan, wan Tebing Tinggi.
Sabalum sampai di Balangan, di Ilung,
Barabai Dugal wan kawannya singgah dahulu. Ada sabuah warung makan langganan. Di
sana inya mamasan katupat, samantara kawannya mamasan nasi kuning. Imbah di Ilung,
Barabai buhannya manuju ka Balangan.
Singgah di Batu Mandi. Mangudak babarapa
tampat manarik. Kaya Pasar Batu Mandi wan Taman Terbuka Hijau Batu Mandi. Jua
Tugu Buah Batu Mandi. Imbah matan Batu Mandi singgah dahulu ka Simpang Tiga
arah Lampihong-Paringin.
Di sana ada tulisan Balangan nang ganal
banar. Di sini Dugal mangudak. Di Paringin singgah di Pasar Paringin wan babarapa
tampat panting lainnya. Tarus ka Juai wan Halong. Jua ka Awayan bakudak di
Benteng Tundakan.
Saharian Dugal mangulilingi Balangan,
ada haja nang kada tadatangi, balum lilip banar. Tapi kaina amun ada waktu
datang pulang ka sana. Bulik ka rumah
hanyar sampai jam 11 malam. Liwar saingnya Dugal hari itu ka Balangan. (ahu)
Tidak ada komentar:
Posting Komentar