Malam Ahad imbah Isya Dugal ka Barabai.
Bajarak sakitar dua puluh dua pal pada rumahnya di Hangkinang. Napakah Dugal
mati katuju banar bajalanan ampah ka Barabai. Padahal parak ka Kandangan, nang
hanya dalapan pal haja pada rumahnya.
Ka Barabai Dugal tulak saurangan
basapida mutur. Kadada tujuan nang pasti. Tapi inya sudah harus bajalanan malam
nintu. Asa muyak aur di rumah saharianan, maurus ingunan hayam kampung wan
bangkuk haja.
Di Barabai Dugal maambil duit dahulu ka
ATM. Lalu manuju arah Tugu Air Mancur Barabai. Disana banyak urang bajualan bagarubak
wan basapida. Ada paman pintul, nasi guring, mulin, is jus, wan lain-lain. Pas
manikmati pintul inya ditagur bibinian bajilbab. Sakalinya kawannya, guru sanawiyah
di Barabai.
Bibinian bangaran Acil Ipah nintu urang
Kandangan jua, tapi bagawi, bagana wan balaki urang Barabai. Kada lawas imbah
bapandiran lawan kawannya nintu, Dugal baalih kalain. Mancari minuman kasukaan
tih is wan guguduh panas pisang manurun. Andaknya parak kantur bang.
Disana inya tahan bajam-jam sambil
bapandiran lawan pangunjung warung. Jua lawan tukang warung nang lalakian
panjaganya. Pukul satangah dua balas malam saku hanyar Dugal bulik manuju Hangkinang.
Sampai di rumah inya langsung bacari kaguringan. (ahu)
Tidak ada komentar:
Posting Komentar