Sabtu, 24 Juli 2021
Lagi kada paduitan, mahayal nang digawi Dugal. Mahayal duit banyak wan kawa manukar nang nyaman-nyaman. Supaya kawa manjalani hari-hari, kuat bagawi, wan jua kuat dalam baibadah.
Dugal mahayal kaya apa sakira kahandak nang sudah ada, kawa jadi kanyataan. Nukar ini itu, wan kahandak nang ada, kada tapi ngalih, sudah ada di hadapan. Nukar ikat pinggang atawa panding.
Nukar salawar panjang hirang dua lambar gasan dipakai ka wadah bagawi. Sapatu hirang jua agan bagawi. Sandal jua sagan kagawian atawa bajalanan. Baju putih, batik, sasirangan, wan baju him lainnya, diipakai gasan kagawian baganti saban hari.
Jua baju muslim tangan handap wan tangan panjang. Kada ingat tapih dua lambar sagan baibadah. Kada ingat jua salawar handap talu lambar, baju lapis putih. Mambaiki rumah nang lantai wan dindingnya mulai japukan.
Mambayari hutang nang wahini ada di babarapa urang atawa tampat, harus salakasnya dilunasi. Amun dapat duit lima ratus juta rupiah atawa satangah miliar, Dugal cagar lakas-lakas mamanuhi sagala kainginan nintu. Nukar amas 100 gram, manabung ke bank, wan nang lainnya.
Jangan kada ingat inya bayar jakat wan basidakah anu urang atawa tampat ibadah wan kagiatan susial kaya pamadam. Jua Dugal cagar bayar pajak sapida mutur bulan Agustus kaina. Mudahanai Dugal barajaki dan kada ingat ibadah tatap dijalanakan. Sambahiyang lima waktu bajamaah jangan tatinggal. (ahu)
Tidak ada komentar:
Posting Komentar