Dalam babarapa hari ini Dugal kada
talihat di kampung. Biasanya amun kada di gardu pus runda, di warung Acil Bulkis
pasti ada tu buhannya takumpulan. Di langgar gin kada talihat jua. Kakawanannya
waktu di warung Acil Bulkis rami mamandir Dugal.
Ujar Gabau mungkin lagi ada kagiatan di
dairah lain jadi kadada di kampung. Samantara ujar Undat kalu garing. Tapi sudah
didatangi ujar kuitannya kadada di rumah. Waktu asik buhannya bapandiran tadi,
datang Dugal.
“Napa Gal ikam kada talihat babarapa hari ini?
“ ujar Gabau batakun.
Lalu Dugal mamadahakan bahwa inya dalam
babarapa hari ini inya ka Balangan. Bamalam anu kawannya ada nang diurus.
“Ulun asa kasapian, kadada pian babarapa hari
ini,” ujar Acil Bulkis sambil manuyrung tih manis pasanan Dugal.
Mandangar kaya itu Dugal asa ganal gulu
baju. “Ulun kasapian jua salawas di Balangan,” ujar Dugal lihum sambil cangang
anu Acil Bulkis, nang dicangangi mangidipakan mata.
“Pantasai ikam Gal ai kasapian, karna parak Hari
Raya Haji,” ujar Undat maungkai rahasia.
“Uh kasapian ti baarti mancari sapi
cagar gasan disumbalih kaina, kada kasapian marga kasunyian pang,” ujar Dugal
galak tatawa. (ahu)
Tidak ada komentar:
Posting Komentar