Gutung Ruyung Agustusan

Rabu, 1 Agustus 2018

Hari Ahad samalam kampung Dugal rami banar. Urang sakampungan takumpul, bibinian lalakian, tuha anum. Ada nangapa ? Atas inisiatip Pambakal Ahyar, diadaakan  gutung ruyung cagar manyambut bulan Agustus. Mimang kampung Dugal ini tamausk kampung nang paling aktip dalam maadaakan macam-macam kagiatan, kaya kagiatan kaagamaan, susial wan nang lainnya.

Karna sudah diundang pada kagiatan nintu, Dugal wan kawannya umpat jua turun. Padahal inya ada rancana bajalanan ka Balangan, tapi karna urusan kampung, Dugal mambatalakan tulak ka Balangan. Sungsung Dugal kaluar rumah manuju tampat gutung ruyung. Ada macam macam tugas nang digawi. Ada nang maulah lawang sakiping, mambarasihi salukan, mancat pagar rumah, wan lain-lain.

Bibinian urusan manyiapakan minuman wan makanan gasan nang umpat gutung ruyung. Tugas ini dipimpin Acil Bulkis dikawani Acil Lisa, Acil Mahda, wan buhan ramaja bibinian lainnya. Dugal tapaluh liir manjalanakan tugas nintu, inya umpat mamasang lawang sakiping nang batulisan Dirgahayu HUT RI di muka Kantur Pambakal.

Tangah hari gutung ruyung tuntung. Buhannya makanan dahulu sabalum bulik ka rumah masing-masing. Tarasa nikmat banar makan siang kali ini, karna nang tukang masak buhan Acil Bulkis. Ada iwak sapat karing basanga, gangan waluh, wan sambal acan. Hancur tu pang liur Dugal. Tasandar Dugal kakanyangan di dinding Kantur Pambakal.

Urang sudah bulikan, Dugal masih ada di Kantur Pambakal. Buhan Acil Bulkis basisimpun bakas urang makanan. Dugal manyirit Acil Bulki, Acil Bulkis lihum, Dugal kada karuan rasa, balalu inya kaluar, kulir mangginii basisimpun.

Dugal maambil ruku di kantung salawar, lalu malikitnya. Imbahitu basandar pulang di gardu pus runda, asa surga dunia, ujar Dugal, karna inya imbah kakanyangan makan mantuk gutung ruyung. Sakalinya dilihumi pulang ulih Acil Bulkis nang lamak mungkal salagi bungas langkar.

Adanya gutung ruyung itu dalam rangka manyambut Agustusan, bukti rasa cinta wan tanah air bubuhan kampung Dugal. Kaina cagar ada lumba-lumba tradisiunal cagar mamariahakan Agustusan, kaya panjat pinang, lari karung, mambawa kalikir, mambuat banyu dalam butul, wan lain-lain. (ahu)