Dalam babarapa hari ini kasihatanku taganggu. Aku batukan nang badahak.
Walaupun kaya itu kagiatan puasa tatap haja lancar. Tanpa ada kurang satu dua
juapun. Tapi nang asa ngalih waktu sambahiyang bajamaah di Langgar Al Kautsar.
Baik itu Isya atawa Tarawih. Maupun jua waktu umpat tadarus Qur’an. Supan waktu
urang khusyu baibadah kita batuk kuhul-kuhul.
Tapi karna sudah kahandak Nang Diatas, tarima apa nang ada ai. Mudahan
ada hikmah nang takandung malalui batuk nia. Mudahan juga lakas sigar. Sahingga
ibadah salawas bulan puasa bajalan baik wan lancar. Sudah pang malam samalam
minum ubat batuk. Takurang kuhul-kuhulnya, sadikit.
Waktu ditampat gawian bila dirasa ada dahak bakumpul di rakungan aku lakas-lakas
kaluar ruangan manuju pabanyuan. Disitu aku sakuat tanaga mangaluarkan dahak
matan rakungan. Nyaman bakurang batuk wan jua dahaknya kada ada lagi. Tapi itu
tarnyata satumat haja. Imbahitu satiap babarapa manit batuk badahak cangul
pulang. Mudahan lakas ampih batuk ini. Nyaman bakagiatan, bagawi, wan baibadah.
(akhmad husaini)
Tidak ada komentar:
Posting Komentar