Anak itik
bakawan angsa
Talincai banih
hanyar disamai
Banyak pahlawan
mambila bangsa
Supaya Indonesia
tatap jaya wan damai
Urang Bamban
manjual tapai
Bawa karanjang
baisi kuini
Nyamannya hidup
Akhmad Husaini
Napa nang
dikahandaki lakas tacapai
Handak bapantul
manabang pinang
Marasai gangan
asa kamasinan
Saban malam
Jum’at di Angkinang
Ada kagiatan
arisan atawa Yasinan
Nukar rambutan
dua kindit
Sapalih rasanya
hambar
Balanting paring
di Sungai Amandit
Panuh
patualangan mambuat hati badibar
Mancari haliling
di balakang pasar
Saing-saing
mambawa hasil
MTsN Angkinang
masuk tiga basar
Humas Award
Kanwil Kamanag Kalsil
Tukang bangunan
maambil paku
Maulah rumah
tarus-tarusan
Rajin-rajin
mambaca buku
Supaya pintar
batambah wawasan
Apik-apik
manyusun sirih
Ada tasusun daun
tarung
Apik-apik umpat
mamilih
Ada tapilih nang
bangkung
Ampat lima
kuriding patah
Patah sabilah
dihiga kalambu
Ampat lima
kutanding sudah
Kada manyama
lawan urang bailmu
Ka kabun Kai
mancari janar
Singgah satumat
maambil nyiur anum
Warung
Pakumpayan rami banar
Wadah
panyinggahan mutur gasan makan wan minum
Manukar wadai
dua halung
Mambari kawan
nang dandaman
Ada makanan
takanal matan Tabalung
Gangan paliat
nang liwar nyaman
Manukar gula
kada tauna
Saban malam
minum kalain
Mudahan blogku
banyak baguna
Gasan saurang
wan urang lain
Sapida mutur
mamakai rantai
Disandarakan di
rapun ganal
Napa ciri has
matan Amuntai
Candi Agung nang
paling takanal
Anak halus kana
karami
Gatalnya
dimana-mana
Sumangka Nagara
sudah musim rami
Banyak dijual
dimana-mana
Maigut jambu
mulai tangah
Malihat warik pina
baribai
Apa nang pian
tahu matan Hulu Sungai Tangah
Ada Pagat wan
apam Barabai
Burung pipit
maulah sarang
Maulah sarang
parak rapun paring
Nyamannya makan
puyau bajarang
Nasi batambah
mandua piring
Imbah ka Simpur
lalu ka Paniungan
Handak batamu
lawan Paman Ijai
Papuyu baubar
bacampur gangan
Ditambah sambal
binjai
Anak haruan anak
kalusukan
Mancari iwak
lawan banjur
Manambah gairah
makan
Nang imbah
garing hancur liur
Maulah hinti
gasan lakatan
Diulah banyak
wan ganal-ganal
Sungai Amandit
di Hulu Sungai Salatan
Wadah balanting
paring nang sudah takanal
Bulik ka rumah
mamakan gangan
Hati himung
dibari urang jakat
Wayahini rindu
makan katupat Kandangan
Karna nyaman
rasanya kuahnya likat
Dinding rumah
banyak cacak
Bajual iwak kada
banyak payu
Napa kakanakan
pina kuriak-kuriak
Bagaya wan
kakawanan basimbur banyu
Minum di warung
mamasan kakau
Saluran banyu
disambat kanal
Rami urang
maunjun ampah ka Bangkau
Bulik ka rumah
bawa pakulih ganal-ganal
Malawan
Uzbekistan Indonesia kalah
Parmainannya
kurang manawan
Datang kabut
asap mambawa masalah
Kapala sakit
hidung salismaan
Sambahiyang
Jum’at di masigit Al Aman
Singah di tuku
manukar bigi ragi
Jangan
dibiasaakan mambawa ganggaman
Wayahini kada
jamannya lagi
Baisukan maulah
gangan
Manutup panci
harus rapat-rapat
Amun singgah di
kuta Kandangan
Jangan kada
ingat dudul wan katupat
Mananam bilungka
di pahalatan
Parak sumur ada
kalatau
Aruh Sastra
Kalimantan Salatan
Tahun ini
giliran di Rantau
Malihat urang
bakalahi kada tapi wani
Kalu tasumbaya
kada singhaja
Amun sudah rasmi
balaki babini
Handak diapai
tasarah haja
Baulah pancuk
pakai cuka
Pabrik samin ada
di Tarjun
Ada tanah
ngarannya balamika
Sarang anai-anai
gasan umpan maunjun
Katapi masak
mangkal
Dijajak
linak-linak
Urang tuha kada
baakal
Malawani kakanak
Ukir-ukir batang
kuranji
Pinang anum
dibalah dua
Jangan dipikir
dalam hati
Mudahan bajudu
kita badua
Basalawar
panjang mamakai panding
Handak tulak
mahadiri undangan
Wahai saudara
wan ading-ading
Mari kita jaga
lingkungan
Nukar sapida
mutur mangaridit
Sapuluh tahun
hanyar talunasi
Radiu di
Kandangan ngarannya Gama Amandit
Wadah hiburan
wan inpurmasi
Gunung tinggi
gunung Halau-Halau
Banyak pacinta
alam manjalajahi
Amun hati pina
galau
Bawa barikriasi
ka Banyu Panas Tanuhi
Bapangantinan manggangan
gadang
Bacampur iwak
diatas piring
Musim kumarau
nang landang
Banyak sumur
liding nang karing
Dua hari umpat
bakimah
Tatamu dukun
mambaca mantara
Raminya lalu
lalang kandaraan di muka rumah
Partanda rakyat
makmur sajahtara
Di Martapura ada
Pangarun
Banyak simpangan
banyak jalan
Dahulu biasa
umpat mangangarun
Mambilupah
mangatam di Gambut babulan-bulan
Malam hari
talihat kunang-kunang
Mambawa banih
sambil disahan
Buhan pian
alumni MTsN Angkinang
Amun pina rindu
bailang ka sakulahan
Manabuk sumur
tanahnya karas
Kada jauh pada
kurungan sapi
Umpat sadih wan
maras
Malihat barita
di tipi siswa tiwas tagugur marga hapi
Buhan palajar
umpat lis
Ada salah harus
dilingkah
Tiada hari tanpa
manulis
Karna manulis
mambawa barkah
Baisukan sawat
mambuka kalas
Kaina datang
imbah istirahat
Manulis sacara
ihlas
Baguna di dunia
wan ahirat
Di bumi hidup
hiwan wan manusia
Binatang liar
hidup di hutan balantara
Aku handak
mangulilingi Indonesia
Malihat kakayaan
Nusantara
Jalan hanyar
diampari batu
Lalu ditambah
tanah kuning
Di Tapin banyak
makam datu
Kaya Datu Suban
wan Datu Muning
Amun bujur harus
maangguk
Supaya hati
manjadi sanang
Ada parajin
tangguk
Ngarannya Sari
bagana di Angkinang
Lalakian Banjar
dikiau Nanang
Ada jalan tulak
naik haji
Ada siswa baparistasi
di MTsN Angkinang
Ngarannya
Aisyatur Ridha nang harat mangaji
Di Padang Batung
maulan dandangan
Ditukar sampai
punah
Warung langganan
di Lapangan Tugu Kandangan
Ngaran sidin
Acil Anah
Manggis gugur
lalu diambil
Bila habis naik
ka puhun
Jalan rusak ampah
ka Gumbil
Lawas
dilihatakan batahun-tahun
Bawa kumpas
supaya kada sasat
Imbah tapisah
lalu batamu
Amun ka Talaga
Langsat
Singgah di
Baladul Amin manuntut ilmu
Mambawa jarum
lawan banang
Tuntung manjahit
kada balaluan
Makam Datu
Taniran di Kacamatan Angkinang
Pusat panyabaran
Islam di Pahuluan
Sambil baucap
muntung banganga
Bila kadap
dihindau sintar
Nyamannya
guguduh basanga
Lawan tih is
sambil duduk dipalatar
Tidak ada komentar:
Posting Komentar