Akhmad Husaini
Gunung Kantawan dan Sungai Amandit
Jum'at, 24 Juni 2011
Siapa nang manyambat amun bajalanan ka Loksado sia-sia haja ?
Inilah parjalanan nang kasakian kalinya ka Loksado. Minimal sabulan sakali aku ka Loksado. Asa puas amun manyaksiakan kaindahan alam Loksado wan baribu pasunanya.
Ka Loksado biasanya wayah bulan anum. Nyaman gasan sangu manukar minuman wan makanan ringan. Jua gasan nukar binsin.
Di tangah jalan ada gardu parsinggahan. Disanalah biasanya kami istirahat satumat mandinginakan masin sapida mutur. Panas matahari asa mambarangat banar. Untung haja mamakai baju tangan panjang wan jakit. Kada jauh ada pos ritribusi gasan pangunjung. Saribu rupiah saikung urang. Lalu dijurungi kartas warna kuning.
Wadah nang rancak didatangi amun bajalanan ka Loksado adalah Tugu Niih, Air Terjun Riam Anai, Air Terjun Haratai, Air Terjun Kilat Api, dsb. Imbah bulik di Loksado singgah di Mawangi yaitu ka TMP PBB sampai sanja.
Kanan kiwa jalan talihat rapun kalapa sawit nang handak babuah. Gunung Kantawan. Sungai Amandit. Tambang galian C lawan mutur trak basarta alat baratnya di Halunuk wan Panggungan.
Namun ada satu hal nang kada parnah dilakuakan sampai wayahini amun ka Loksado yaitu umpat marasaakan patualangan balanting paring. Karna tabantur wan biaya.
Loksado nang salawas ini hanya kudangar liwat urang maupun mambaca, malihat matan surat kabar wan tipi. Wahini kusaksiakan langsung lawan mata kapala saurang.
Pamulaan ka Loksado tahun 1995. Wayah itu aku masih sakulah di MAN 2 Kandangan. Maadaakan Perjusami wajib gasan siswa nang hanyar.
Loksado jadi pilihan. Saat nintu Loksado masih barupa hutan wan samak balukar. Adapun wisatanya waktu itu ka Air Terjun Riam Anai ampah ka Malaris.
Sabulan kada ka Loksado tarasa sunyi wan hampa.***
Tidak ada komentar:
Posting Komentar