Jawaban Matan Sabuah Harapan

Kamis, 23 November 2017

Oleh : Akhmad Husaini

Harapan-harapan indah nang dibawa tumatan Banjar  nintu wahini maulah Madan sasain tapukul waktu manamui Ipah sahari imbah baistirahat lawan uma wan ading-adingnya. Ipah salalu manutup diri. Inya salalu mahindar amun Madan mandatangi rumahnya. Kanapa kaya itu? Apakah bujur Ipah sudah bahubungan asmara lawan lalakian lain?

Malam nintu di Kandangan ading-ading Madan sudah guringan imbah Isya. Umanya manjahit baju Madan nang rabit dikatiaknya. Madan barabahan di ranjang subalahnya. Kaya samalam wan hari-hari sabalumnya, inya jarang banar bapandir napalagi amun bahuhulut. Hal nintu cukup manyiksa umanya wan talu ikung adingnya.

Padahal sabalum ka Banjar Madan akrap banar lawan buhannya. Hari dami hari di rumah gubuk nintu dilalui lawan kahimungan. Suara tatawa kada parnah habis walaupun imbahanu makan cuma dua kali sahari. Umanya Madan mungkin kada tahu bahwa hati Madan sadang tabalah. Inya asa supan, kada kawa mamanuhi harapan buhannya.

Bulik matan madam ka Banjar inya tatap kada kawa maringanakan baban kuitannya. Tarutama gasan umpat manggini’i mambiayai sakulah ading-adingnya. Bahkan Madan sampat mambilupah mangatam banih di Gambut. Namun gawian nintu waktunya kada lawas. Sabulan bagawi, bulan kainanya kada ada lagi gawian.

Wahini Madan taganggu parubahan sikap Ipah. Bukankah kada patut bagi saurang anak, sabalum sanggup mandiri wan mambalas bakti lawan kuitan sudah mamikirakan sual cinta ?

Namun napapula nang masti dilakuakan apabila parasaan nintu datang kada diundang.

" Dan, ikam pina murung haja. Ada masalah napa Dan ?" ujar Umanya batakun sambil mamasukakan banang paampihan dibaju rabit ampunnya.

Madan kada manjawap. Inya bangkit dan duduk bajuntai di pinggiran dipan.

" Kada apa-apa Ma ai. Biasa haja," kilah Madan imbahitu.

" Aku kan Uma ikam. Sambat haja tarus tarang napa masalahnya ?" Umanya mandasak.

" Sual Ipah ? "

Madan taparangah. Inya hakun manjawab lain namun muntungnya tarasa takunci. Handak manggiling tapi tanyata maangguk.

" Kaya ini Dan. Mama sudah babuat lancang. Mandahului rancana ikam," ujar Umanya Madan sambil maandak wan malipat baju Madan di lamari tuhanya.

" Lancang kaya apa ? " Madan dagup-dagupan.

" Mama sudah mandatangi Acil Bayah, mamanya Ipah. Siang tadi."

" Ha ? " Madan tabuncalak. Pasti umanya mainta supaya Ipah jangan tarus mangganggunya. Padahal Ipah kada parnah mangganggunya. Justru Madanlah nang rahat maudaknya, nang mahandaki inya.

" Mama padahakan tarus tarang bahwa ikam mancintai Ipah wan aku malamar Ipah gasan jadi bini ikam," ucap Umanya parak kada tadangar ulih pandangaran Madan. Suaranya nang cukup karas bagi Madan talalu lambat.

Mata Madan baputar-putar, lain kapalanya nang tujuh kuliling sabagai mana dirasaakannya matan babarapa waktu lalu.

Madan babunga-bunga hingga kada mampu mangamukaakan sasuatu kacuali languhan "ah mama".

" Kaya apa  pandapat mama Ipah ?" takun Madan badibar.

Uma Madan kada langsung manjawap. Inya mangitari dahulu.

" Napa ikam yakin Ipah mancintai ? "

Madan tahantak bingung. Bujur jua. Kanapa inya manakunakan pandapat umanya, Acil Bayah? Kanapa inya kada manakunakan pandapat Ipah saurang.

" Ulun manyangka kaya itu Ma," jawap Madan diliputi lawan kabimbangan. Umanya Madan manatap anaknya. Ada cahaya mamalas tapancar matan pandangannya. Iba.

" Sual mamanya sudah biris Dan. Acil Bayah himung banar ikam bamaksud maambil bini anak gadisnya."

" Alhamdulillah," Madan tahanyak himung di wadahnya.

" Tapi urusan balum tuntung," pagat umanya, manabang kabahagiaan Madan.

" Urusan napa Ma ?" garunum Madan manggatar.

" Baisukan isuk ikam dihadangi Acil Bayah gasan bapandir ampat mata."

Dihadangi Acil Bayah ? Kanapa maka kada dihadangi Ipah ? Kanapa nang minta bapandir ampat mata umanya ? Ada parsualan nangapa ? Anih. Waktu nang sudah ngalih banar jam-jam pada hari itu diliwatinya dalam guring saraba galisah. Baisukan banar jauh sabalum Subuh inya sudah bangun wan i'tikap di Langgar Al Kautsar.

Guru Abduh bahkan hanyar  datang satangah jam imbahitu. Padahal biasanya Guru Abduh nang baada di Langgar pamulaan banar.

Madan mancagat Guru Abduh manjalang Kai Sabri datang gasan mancatuk dauh wan mangumandangakan bang.

" Guru, ulun mamuhun rastu guru," ucap Madan satangah babisik sabab kada kuat manahan kalambapan hatinya mamikirakan kaya apa bakal dihadapinya kaina apabila bajumpa lawan Acil Bayah, umanya Ipah.

" Gasan apa nak Madan ? " takun Guru Abduh dalam pandangan Madan muhanya sasain basinar dalam umurnya nang sasain tuha.

" Ulun handak mangawini Ipah Guru ai, " ujar Madan pina takutan. Sajalik-jalik dirinya inya adalah murid Guru Abduh waktu halusnya. Madan masih ingat waktu duduk dibangku SD lawan kakawanannya sa kampung balajar mangaji anu Guru Abduh saban hari imbah sambahiyang Maghrib. Marga sidinlah Madan wan kakawanannya bisa mangaji.

Madan takutan kalu Guru Abduh bakal marintangi niatnya. Sabab Acil Bayah dahulu adalah bakas panjapinan. Samantara Ipah dihabarakan sabagai anak kampang.

" Alhamdulillah, " tanyata Guru Abduh bamuha tarang mandangar niat suci nintu.

" Tapi mama Ipah bakas panjapinan. Kabarnya Ipah anak kada sah Guru ai," sanggah Madan, takutan Guru Abduh Alhamdulillahnya kada bujur-bujur.

Guru Abduh manggaling-gilingakan kapala sambil lihum.

" Dan. Panjapinan nintu gawiannya haja kalu. Kadada hubungannya lawan kalakuan atawa kada baiknya sasaurang. Sadangkan habar manganai Ipah anak tidak sah itukan cuma habar angin haja. Kalaupun bujur dusa nintu kada sapatutnya manjadi baban si anak. Karna anak dilahirakan matan parnikahan atawa parjinahan, tatap suci Dan ai. Nang batanggung jawap adalah kuitannya. "

Wahini Madanlah nang maumumakan Alhamdulillah dibibir dan hatinya. Lawan hati nang ganal, pukul dalapan baisukan Madan sudah duduk di rumah Ipah, mahadangi Acil Bayah nang sadang tanggung manyanga karupuk Bamban. Ipah kada cangul sama sakali.

Babarapa saat dilanda tanda tanya wan kacamasan saurangan Madan sampat bajanji, napapun nang diminta Acil Bayah inya akan basadia malulusakannya asalakan bulih mangawini Ipah.

" Maap ya Dan, ikam tapaksa manunggu lawas," ucap Acil Bayah imbah duduk manamui Madan.

" Ah kada apa-apa," jawab Madan satangah manunduk.

" Kaya ini Dan ai. Apakah maksut ikam sudah bulat handak manikahi Ipah ?" Acil Bayah batakun langsung mamasuki parsualan pukuk.

" Matan dahulu ulun mancintai Ipah," ujar Madan pina pasti.

" Aku himung Dan ai. Tapi Ipah sadang dilanda kabingungan. Inya bimbang handak manarima lamaran ikam."

Galidik manyambar Madan ditalinganya. Gampa manindih Madan di dadanya.

" Kanapa Ma ? Apakah Ipah sudah baisi nang lain ?"

Acil Bayah lihum. " Kada Dan ai. Inya mangaku sabujurnya sangat mancintai ikam."

Galidik balalu. Gampa manyurut. Cuma angin sapui balum batiup. Madan batakun ragu-ragu. " Jadi apa kabaratannya Ma ?"

Acil Bayah mancangangi ke lalangit nang hatapnya tabuat matan daun rumbia nang mulai titikan bila hujan turun karna sudah talu tahun baluman diganti. Imbah ampih jadi panjapinan tambahan lagi imbah jadi balu, Acil Bayah hampir kada bisa mambari makan cukup gasan anak sasaikungannya, Latipah.

Imbah mangumpulakan kawaniannya, Acil Bayah lalu baucap, " Ipah marasa sudah mahianati ikam salawas di Banjar. Inya taguda ulih pamuda asal Hamuntai bangaran Hapis. Awaknya sudah dinikmati pamuda nintu, maskipun untungnya inya tatap kada hakun manyarahakan kahurmatannya. Apakah ikam kada kabaratan manarima Ipah dalam kaadaan kaya itu ? "

Ranai. Itulah nang tajadi wayah itu. Madan ranai. Acil Bayah ranai. Barangkali Ipah di dalam kamarnya jua ranai. Bahkan daun kalangkala di higa rumah umpat ranai. Imbahitu mata Madan basah. Hinaknya tasangal-sangal, batapapun inya bausaha manahan kagalauan hatinya. Namun akhirnya inya mamaksa diri gasan manjawap. " Labih dari nintupun kada akan manggagalakan tikat ulun Ma ai. Ulun tatap mancintainya."

Pilar nintu rubuh. Pilar katagangan. Mandung nintupun sirna. Mandung katakutan. Matahari nintupun sasain nyarak. Matahari kacarahan. Ipah tiba-tiba kaluar matan dalam kamarnya wan marabahakan diri di hadapan lintuhut Madan.

" Maapakan ulun, Ka ai."

Atas parsatujuan kadua balah pihak, hari pangantinan ditantuakan dua bulan lagi. Umai-umai alangkah indahnya imbah itu. Madan wan Ipah manyatu pulang lawan cinta nang tulus.***

Kandangan,  April - Agustus 2015