Malima hari saku Dugal kada talihat di
kampung. Buhan kakawanannya kaya Undat, Abau wan Kacit kada tahu habarnya.
Biasanya bila kamana-mana Dugal salalu bapadah anu katalu kawannya nintu.
Malam Ahad Dugal tiba-tiba cangul di gardu
pus runda. Laluai nang batalu tadi batakun anu Dugal kamana haja salama lima
hari kadada di Banua. Dugal bapadah, inya umpat rumbungan bagawi di kantur bajalanan
ka Lombok, Nusa Tenggara Barat.
Mandangar kaya itu buhan Undat paham
sakaligus bingung. Hanyar tahu ada ngaran dairah di Indonesia nang bangaran Lombok.
“Napa haja ti disana dilihat,” ujar
Undat batakun anu Dugal.
Ujar Dugal, ada banyak pamandangan alam
nang indah, sani budaya wan makanan nang nyaman-nyaman, kami manginap di hutil
parak pantai, rancak talihat ‘sumur’.
“Garatislah Gal ikam tulak kasana ?”
takun Abau.
“Kada, aku tulak babayar jua. Tabungan
hasil bakabun lumbuk parawit kubawa kasana. Jadi kupadahakan anu buhan ikam
barataan supaya tahu, kasana kada garatis, sangu kasana duit hasil tapaluh liir
jua,” ujar Dugal.
Jadi tulak kasana sudah kapadasan,
imbahitu dairah nang dikunjungi jua kapadasan karna bangaran Lombok, buliknya kapadasan,
karna tamakan makanan nang padas-padas.
Lalu Dugal mambarii Undat, Abau wan
Kacit ulih-ulih barupa lumbuk parawit nang sudah diawitakan bapalastik. “Hanya ini nang bisa kubariakan anu buhan
ikam,” ujar Dugal.
“Cah amun nang kaya ini kada jauh-jauh
ka Lombok manukar disini gan banyak,” ujar buhannya tatawaan. (ahu)
Tidak ada komentar:
Posting Komentar