Dugal parcaya banar, amun umur itu kada babau.
Samalam inya malawat ka Perumnas Kalian Asri Kandangan, ada sakitar sapuluh pal
pada rumah Dugal. Kepala Kantor Kementerian Agama Hulu Sungai Selatan nang
hanyar babarapa minggu manjabat, Abd Wahab Sya’rani maninggal dunia.
Dugal paampihan batamu sidin waktu acara
Hari Jadi Kacamatan Angkinang balum lawas tadi. Dugal sawat basalaman wan
mangudak sidin. Sidin urangnya baik, panaguran manyambat langsung ka ngaran
bila batamu.
Dugal ada kalu babarapa kali dibayariakan
sidin minum waktu ada acara di Kantur Kemenag HSS. Dugal mando’aakan mudahan
amal kabaikan sawaktu hidup mandapat ganjaran Allah SWT.
Hari ini tadi giliran tatangga kampung Dugal
nang maninggal dunia. Ngaran sidin Utui Ambrun, umurnya sakira parak 60-an.
Sidin bagana di Pahalatan, Hulu Sungai Tangah, karna tapabini uran sana.
Utui dikuburakan di kampung Hangkinang,
imbah sambahiyang Juhur. Dugal umpat jua manyambahiangakan wan maatar ka pakuburan.
Sawaktu hidup wan masih bagana di Hangkinang, Utui urangnya rajin bagawian, tarutama
bahuma, hakunan disuruh napa haja asal kada taraung gawian inya. Inya tapabini
urang Pahalatan, kampung iwak di Barabai, pas haja pang inya katuju maiwak.
Sawaktu hidup Utui dikaruniai anak.
Salamat jalan Utui samuga Khusnul Khatimah, kaluarga nang ditinggalakan tabah
wan sabar mahadapi. Kilir-kiliran banyu mata Dugal, karna umur kada babau,
pabila sampai sudah, kita kada kawa manangati Malaikat Pancabut Nyawa cagar maambili.
(ahu)
Tidak ada komentar:
Posting Komentar