Humor Banjar Akhmad Husaini

Kamis, 4 Maret 2010

SI PALUI :

PARTUNJUKAN ANIH

Oleh : Akhmad Husaini



" Aku kadada manyambat bisa tarabang kaya burung atawa Superman nang ada dipilim. Tapi aku manyambat 'handak tarabang' artinya aku sudah malaksanaakan tugas yaitu naik ka atas bubungan masigit wan tanganku tadi sudah kuurak kaya halar burung," ujar Palui takurihing pina musti.


Mandangar kaya itu garunuman panuntun. Sambil tunggal ikungan bulikan karna marasa dikaramputi mantah-mantah ulih bubuhan Palui.

SI PALUI :

MANGARAMPUTI TURIS

Oleh : Akhmad Husaini

Sampai wayahini Palui paling takutan atawa trauma bila batamuan lawan turis asing. Karna bahari ada kajadian nang manyupanakan.

Kisahnya wayah lagi kakanakan biasa bailang anu acilnya nang badiam di Loksado. Rami banar Palui malihat pamandangan alam nang indah wan adat budayanya nang masih asli. Matiam turis asing banyak nang datang bakunjung.

VOA WAN POA

Oleh : Akhmad Husaini

Untung banar mamarina Palui nang bangaran Haji Durasit. Karna anak nang pahalusnya nang kuliah di Amirika sudah tuntung. Hal ini jadi pamandiran urang di warung Acil Irus.

" Bujur-bujur untung. Sudah sugih pintarha pulang. Sakakalinya," ujar Tulamak.

" Ujar habar sudah mulai lagi halus anak Haji Durasit nintu katuju mambaca alias kutu buku. Matiam katuha pintar. Karna kuitannya mimang baduit jadi kawa manukarakan buku bacaan gasan anaknya. Lain kaya kita kada kawa manukarakan, gasan makan sahari-hari haja bakipuh mancariakan," ujar Garbus pina marista.

" Itu mungkin sudah nasibnya Bus ai. Kita basukur jua kawa manyakulahakan kakanakan mudahan tamat sampai SMP barang. Kada kaya kita SD haja gin kada tamat. Mudah-mudahan anak kita nyaman kaya urang jua," ujar Tulamak.

" Napa habar nih pina rami buhan ikam bapandiranlah," ujar Palui nang hanyar haja datang.

" Bujurankah Lui anak mamarina ikam bagawi di Amirika ?" ujar Tulamak batakun.

" Iih bujuran. Inya bagawi di VOA," ujar Palui.

" Napa Lui VOA nintu ? Kantur napa nintu ? Samakah lawan kantur KUA wadah urang nikah masi ?" ujar Garbus.

" Ujarti VOA nintu kapanjangan Voice Of America atawa Radio Suara Amerika. Pas lawan jurusannya waktu inya kuliah dahulu di Fakultas Komunikasi," ujar Palui pina lancar basasambat.

" Wajar haja pang anak mamarina ikam bagawi di VOA. Karna ada tuturunan lawan ikam," ujar Garbus.

" Tuturunan napa Bus ?" ujar Palui.

" Bahari ikam sawat jua kalu jadi anggota POA?" ujar Tulamak.

" Palui rajin datang ka urang aruh walau kada disaru. Jadi disambat POA alias Panyalidik Orang Aruh," ujar Garbus.

" Sssst badiamha kaina katahuan urang. Jangan maungkai nang bahari-bahari. Supan kaina aku," ujar Palui kakalahan sambil tunjuk tangan kanannya diandak ka hidung.

BALAJAR BAUDU

Oleh : Akhmad Husaini

Mintuha Palui bujur-bujur urang udik. Sual agama sudah kada pati ruus, pangulirha pulang baibadah. Tapi untung haja salawas baminantu Palui ada usaha gasan mandalami ilmu agama.

Suatu hari sidin mambawai Palui inta lajari tatacara baudu nang bujur.

" Lui pabila yu kada aur lajari pang Abah baudu."

" Ayuha Bah ai kaina ulun lajari," sahut Palui.

Rumah mintuha Palui andaknya parak sungai.

" Pada palaksanaannya kaina nyaman haja. Cuma saratnyaharus pian ingat, bila sudah mambaca lafaz niat lalu pasang niat dalam hati, kita kada bulih bapandir lagi. Amun bapandir kaina udunya batal. Pukuknya napa nang ulun gawi pian turuti. Bila ulun mambasuh muha, pian jua manirunya. Ulun mambasuh tangan, pian jua maniru. Sampai tuntung," ujar Palui manjalasakan.

Nang mintuha unggut-unggut haja. Mangartikah kadakah. Tapi dalam hati sidin tasimpan parasaan himung wan bangga baisian minantu nang banyak baisi ilmu pangatahuan agama, nangkaya cara baudu tadi. Kalabihan lain nang dimiliki Palui adalah baisi daging tambahan nang ada diparak alat kalaminnya nang biasa disambat urang lawan burut.

Kamarian imbah sambahiyang Ashar Palui mambawai mintuhanya ka batang banyu kada jauh pada rumah mintuhanya gasan mamparaktikkakan kaya apa cara baudu nang bujur. Talihat mintuha Palui mamakai tapih puga nang balilit dipinggang. Kada katinggalan kupiah jangang wan baju taluk balanga nang masih tacium bau pabriknya. Capnya haja masih balum dipacul. Baarti sidin nintu baduhara banar handak malaksanaakan amal ibadah.

" Mari kita mulai Bah ai," ujar Palui anu mintuhanya.

" Ayuha ! Aku siap sudah Lui ai," sahut mintuhanya.

Imbah nintu Palui mambaca lafaz niat baudu. Lalu mintuhanya mairingi. Samuaan nang digawi ulih Palui ditiru saratus parsin ulih mintuhanya. Sampai pada garakan paampihan gasan mangganapakan nang katiga kali mambasuh batis kiwa kanapa maka lanting baguyang. Karna kada siap Palui tacabur ka sungai. Kuntan haja mintuhanya nang masih baada di atas lanting umpat jua bacabur. Palui naik ka lanting nang mintuha umpat jua.

" Bah iya pang nia," ujar Palui bingung.

" Gawat banar nia ! Bayangakan amun urang nang hanyar masuk Islam handak sambahiyang pas kada bisa bakunyung ?" ujar mintuha Palui dalam hati.

Karna kada bulih bapandir mintuha Palui baranai haja. Sabab sidin takutan udunya kaina batal.

" Satuuup," ujar Palui sambil maangkat tangan.

" Satuuup," ujar nang mintuha manuruti.

Mandangar kaya itu Palui jadi garigitan malihat kalakuan mintuhanya nang tuturutan wan lambat paham. Padahal nintu tadi di luar katantuan nang ada. Imbah nintu Palui bukah ka atas tabing. Inipun ditiru jua ulih nang mintuha.

" Bamandak," ujar Palui bakuriak.

" Bamandak," ujar mintuha Palui maulangi.

Palui bukah baputar di parak rapun kasturi nang ganalnya sapangragap.

" Hanyar baudu balum lagi sambahiyang sudah ngangal banar. Tapi biarha ngangal, asal Islam, asal sambahiyang, asal masuk surga," ujar mintuha Palui.

Palui mamutar utak dimapa sakira kalakuan mintuhanya nang tuturutan nintu jadi ampih.

Lawan garakan nang cukup lincah Palui bamandak sambil mamutar awak saratus dalapan puluh darajat. Pas nang kaya kakanakan diragapan kuitannya. Takuk mintuhanya dikacak Palui lalu dijuhut bagamat ampah ka bawah. Tantu haja nang mintuha kasakitan.

" Ampih Lui, ampih Lui," ujar mintuhanya.

" Pian lapas jua," ujar Palui karna marasa kasakitan jua marga burutnya dikacak nang mintuha.

Hanyar imbah nintu paraktik baudu nang diluar jalur tadi bamandak.

LAIN NANG DITIMBAK

Oleh : Akhmad Husaini

Warga di kampung gigir. Palui dibawa ka kantur pulisi. Kabalujuran pulang anak kamanakan Pambakal Ijap nang bangaran Burhan masuk rumah sakit dibawa ulih kaluarganya bamutur ambulan. Tadangar habar amun masuknya Burhan ka rumah sakit nintu marga ditimbak ulih Palui lawan sinapang angin. Laluai Palui dilapurakan ka pulisi.

" Katalaluan banar kawan kita nintu sampai kakanakan haja ditimbak. Kadada gawian lain lagikah, " ujar Garbus.

" Amun pambakal Ijap datang tahu rasa kaina. Karna sidin takanal panyarikan," ujar Tulamak pina takutan.

" Kamana garang sidin Mak ?" ujar Tuhirang batakun.

" Sidin ada urusan panting, tapi kada lawas," ujar Tulamak.

" Tapi aku kada parcaya Palui sampai babuat sakajam itu," ujar Garbus.

Kada lawas datang pambakal Ijap kaanu buhannya bamutur sidan ampun sidin saurang.

" Anu pambakallai, anak kamanakan pian si Burhan ka rumah sakit," ujar Tulamak.

" Napa marganya ?" ujar pambakal Ijap batakun pina takajut.

" Ujar habar inya ditimbak ulih Palui lawan sinapang angin," ujar Garbus.

" Paluinya am mana ?" ujar pambakal Ijap pina sarik.

" Inya dibawa ka kantur pulisi," ujar Tuhirang.

" Amun kaya itu aku handak ka rumah sakit. Buhan ikam amun handak umpat babuatanha ka muturku," ujar pambakal Ijap mambawai.

Samantara itu di kantur pulisi Palui mulai dipariksa.

" Bujurkah sampian manimbak si Burhan anak kamanakan pambakal Ijap? "ujar pulisi batakun anu Palui.

" Inggih bujuran Pa pulisi ai," ujar Palui manyahut tarus tarang.

" Tahulah sampian hukumannya amun manimbak urang nang kada basalah. Itu sama haja lawan pambunuhan. Hukumannya barat banar," ujar pulisi.

" Tapi aku manimbak Burhan karna salah inya jua. Aku muar banar. Tiap malam inya mangganggu aku guring," ujar Palui.

" Baarti sama kaya itu pian malakuakan tindak pidana kajahatan nang tarancana. Amun kaya itu malam ini pian kami kurung," ujar pulisi sambil mambawa Palui.

" Aku kada basalah pulisi ai. Napa mati dikurung," ujar Palui pina sarik waktu handak dimasukkakan ka sel tahanan. Tapi tatap haja inya kalah karna sudah ada talu ikung pulisi nang lain nang handak mambawanya. Awaknya ganal-ganal. Palui pina takutan jua. Pas bakakarasan nintu datang pambakal Ijap wan buhan Garbus.

" Jangan dimasukkakan ka panjara pulisi ai. Kasihan Palui kada basalah," ujar pambakal Ijap bakakajutan.

Mandangar kaya itu bubuhan pulisi kada jadi mamasukakan Palui ka dalam sel tahanan.

" Napa mati malarang kami mambawa ka sel tahanan, pambakal !" ujar pulisi.

" Tanyata Burhan anak kamanakanku itu kada marga ditimbak Palui. Inya dibawa ka rumah sakit marga takana chikungunya," ujar pambakal Ijap mamadahakan.

" Jadi siapa Burhan nang ikam timbak itu Lui ? " ujar pulisi maanyaki batakun anu Palui.

" Nang kusambat Burhan tadi adalah ngaran singkatan. Inya nang mambari muar saban malam sampai-sampai aku kada taguring. Inya bagana di higa rumahku. Pas kusintari tanyata ada di atas rapun balimbing. Imbah nintu kuambilai sinapang angin karna sudah kamumuaran. Lalu kutimbak," ujar Palui manjalasakan panjang libar tapi masih mambuat bingung nang mandangarakan.

" Siapa Lui Burhan nintu tadi ?" ujar pambakal Ijap maulangi tatakunan pulisi karna panasaran.

" Tapi pian jangan tasinggung pambakallah karna sama lawan ngaran anak kamanakan pian nintu. Burhan itu tadi adalah singkatan dari Burung Hantu. Makanyaam ulun wani manimbaknya," ujar Palui himung. Nang lain tadarau tatawaan mandangarakan.

SULING BAMBAN

Oleh : Akhmad Husaini

BUBUHANNYA takumpulan di warung Acil Irus. Palui hanyar aja kawa bakumpulan, karna batangah bulan tulak ka Angkinang mahadiri acara bakawinan anak mamarinanya.

"Barapa kali sudah Lui ikam mailangi mamarina ikam itu?" ujar Acil Irus sambil manyurungi banyu teh lawan Palui.

"Hanyar sakali itu," ujar Palui.

"Kaya apa habarnya salawas di Angkinang," ujar Tulamak.

"Aku marasa himung. Karna di sana pambangunannya talihat maju kada katinggalan lawan dairah lain. Di sana banyak jua rapun nang ganal-ganal, nyaman gasan banaung. Kada kaya di kuta nang panas karna kadada wadah gasan baistirahat. Di situ warga rakat jua bagutung ruyung, kaya manajak sarubung, mangawah wan babasuh piring," ujar Palui.

"Amun kaya itu baarti masih ada haja nilai-nilai budaya bamasyarakat nang lastari. Kada kaya di kuta nang handak napa-napa pasti baduit," ujar Tulamak.

"Pangalaman lain adalah Lui," ujar Garbus.

"Ada pangalaman lucu wan anih waktu aku ada di sana," ujar Palui.

"Napa nang anih! Apa ikam di sana batamu lawan hantu?" ujar Tulamak.

"Kada sual hantu, tapi pas mamarinaku maadaakan karasmin.. ada nang anih," ujar Palui maulah kakawanannya panasaran.

"Napa karasminnya Lui?" ujar Garbus mamagat pander Palui.

"Karasminnya adalah suling bamban," ujar Palui.

"Hau, bujuran anih lah. Saumuran hanyar aja aku mandangar. Mau juakah sulingnya babunyi?" ujar Garbus.

"Aku jua mangira suling nang diulah dari bamban, tanaman nang batangnya miring. Kawa diulah jadi bakul pamasakan," ujar Palui.

"Imbah pang kaya apa karasminnya," ujar Tulamak.

"Sakalinya kaya urkis dangdut biasa. Tapi parbidaannya urkis itu diiringi lawan babarapa buah suling," ujar Palui.

"Sulingnya suling bamban lah Lui," uajr Garbus.

"Sulingnya suling biasa jua. Ada suling nang diulah dari bambu alias paring. Ada jua suling wasi,"ujar Palui.

"Napa marganya mati disambat suling bamban Lui. Padahal kada diulah dari bamban," ujar Garbus.

"Asa kada mungkin. Ikam nih bakaramput haja kalu Lui," ujar Tulamak.

"Aku kada bakaramput. Handak tahu lah sakalinya bubuhan paurkisan tadi asalnya matan kampung nang ada di Angkinang yaitu kampung Bamban. Jadi dingarani ‘Suling Bamban’," ujar Palui takurihing.

"Bah kami kira bujuran diulah matan batang bamban, sakalinya ngaran grup urkis nang baasal matan kampung Bamban," ujar Garbus wan Tulamak.

"Makanya rajin-rajin buhan ikam mailangi kulawarga nang jauh. Nyaman pangalaman batambah wan kada katinggalan habar," ujar Acil Irus.

* Cerita Si Palui diatas pernah dimuat di SKH Banjarmasin Post edisi Kamis, 15 September 2005 M /Sya'ban 1426 H