Dugal taumpat jua kacanduan kaya urang,
wahini nang lagi rami. Yakni mangitih kuaci bigi kambang matahari. Biasa Dugal
bagawi sambil mangitih kuaci. Paling sadikit Dugal manukar lima bungkus kuaci
nang haraga sabutingnya saribu rupiah sabungkus.
Dugal manukar di kius muka kantur wadah
inya bagawi. Karna napakah Dugal katuju banar mangitih kuaci. Basapai ratik
bakas kulit kuaci di ruang inya bagawi. Sampai-sampai kawannya tauling malihat.
Kada di kantur, imbah bulik bagawi, Dugal
malanjutakan gawian mangitih kuaci di rumahnya. Biasa imbah Isya, di muka tipi.
Kuaci puluhan bungkus dihantupnya. Kuaci nang ada dimasukakan ka pipiringan.
Gasan kulitnya mamakai piring lain. Tahan
bajam-jam Dugal mangitih kuaci nintu. Bahanu kuitannya mamadahi, kuaci kada
cagar manganyangi. Malahan wihang pina panat, karna kada sing ampihan mangitih
kuaci. (ahu)
Tidak ada komentar:
Posting Komentar