Lawas kada talihat di kampung, Dugal
cangul pulang bakawanan lawan kakawanannya nang ada di gardu pus runda, malam
imbah sambahiyang Isya. Kaya biasa rami buhannya bapandiran. Dugal jadi bahan
pambicaraan malam nintu.
Lalu Dugal mamadahakan ka anu kawannya
nang ada di gardu, bahwa ada saku mandua bulan inya kadada buriniknya. Inya
salawas kurang labih dua bulan nintu ada haja di kampung.
Amun baisukan imbah maurus ingunan hayam
kampung, balalu mangalunyur basapida mutur, sasuai hari nang ada. Amun hari
Sanayan inya bajalan ampah ka Pasar Birayang, hari Salasa ka Pasar Pantai
Hambawang.
Imbahitu amun hari Arba ka Parpustakaan
HSS mambaca buku, hari Kamis ka Pasar Ilung atawa di kampung haja, pas hari pasar
di Pasar Hangkinang, hari Jumahat ka Pasar Bagambir, hari Sabtu ka Pasar
Halong, hari Ahad bajalanan ampah ka Barabai atawa Balangan.
Biasanya inya bulik malam. Napa haja
nang dicarinya amun mandatangai pasar-pasar nintu ? Inya balihat urang bajual
hayam kampung, hayam bangkuk wan sajanisnya. Bila ada nang dikatujui, ditukarinya,
dibawa bulik ka rumah gasan manambah ingunan hayam.
Salain itu jua, Dugal mandatangi tampat
wisata nang kawa dituntinya, biasanya wisata alam. Tarutama wisata nang sunyi.
Dugal katuju banar wadah nang sunyi, jauh pada urang banyak. Inya cagaran
banyak baulih ilham wan inspirasi gasan jadi bahan tulisan. Kaina bisa diulahnya
jadi puisi atawa kisah parjalanan.
Kakawanannya hanyar paham, kanapa mandua
bulan Dugal kada talihat di kampung, jadi kaya itu tih gawiannya hari-hari.
Pantas haja, kawannya mangira Dugal lamas, kadada buriniknya lagi. Sukuram
sudah babulik pulang ka kampung, sambil manjalani gawian kaya masi. (ahu)
Tidak ada komentar:
Posting Komentar