Dahulu, waktu masih Kalas Satu baampah
ka Kalas Dua Sanawiyah, amun ada urang aruh haja hanyar Dugal sambahiyang bajamaah
di Langgar. Amun kadada urang aruh atau salamatan, Dugal sambahiyang di rumah
haja. Jadi Dugal jarang talihat di Langgar.
Walau Dugal tahu pahala bajamaah labih
ganal pada sambahiyang saurangan. Apakah kada supan, bila ada urang aruh hanyar
ka Langgar? Supan pasti ada, tapi amun bakalan balapar, baik ka Langgar ha,
karana mimang sudah ada urang nang manyaru.
Salain nintu amun di rumah saurang, cuma makan makan nasi bacacapan
banyu uyah bacampur bawang wan asam kamal haja. Baik tulak ha ka Langgar. Amun
di urang aruh pamakan nyaman. Di rumah urang nang aruh, ada nasi putih, iwak
hayam atawa haruan, imbahitu ada banyu tih bagula wan jua wadai gasan cuci mulutnya.
Marga kabiasaan nintu, ahirnya kakawanan
Dugal di kampung manggalari lawan Dugal SMA, padahal inya masih sakulah
Sanawiyah. Pamulaan disambat Dugal SMA kada sarik, tapi imbah tahu kapanjangannya
hanyar muha pina ubah. SMA itu sakalinya kahundapan matan Sambahiyang Maunting
Aruh. Handakai Dugal sarik, tapi karna bujuran jua pang, inya ranai haja. (ahu)
Tidak ada komentar:
Posting Komentar