Panampilan bapakayan Dugal kada kaya
urang. Tapi tanyata, urang malihat kita matan pakayannya, balalu lain sangkaan.
Tapi sukur amun sangkaan nintu nang baik, bisa jadi do’a.
Kaya kajadian nang dialami Dugal waktu
umpat Aruh Sastra di Pagatan, Tanah Bumbu samalam. Kada disangka-sangka inya dikiyau
urang Pahaji. Karna waktu tulak Dugal bapakayan baju muslim putih, basalawar
panjang hirang, wan waktu handak sambahiyang mamakai kupiah putih / kupiah haji.
Buhan lalakian rumbungan buhan Dugal
singgah sambahiyang Jumahat di Masigit Al Istiqomah Km 42 Mantewe. Singkat kisah,
tuntung sambahiya Jumahat Dugal duduk di palataran balakang masigit, mahadangi
kawannya nang bakamih di wisi.
Ada saikung jamaah, warga sakitar batakun. “Matan mana wan handak kamana pian
Pahaji ?” takun urang nintu.
“Ulun matan Kandangan handak ka Pagatan
Tanah Bumbu umpat kagiatan Aruh Sastra,” ujar Dugal.
Asa ganal gulu baju Dugal, imbah dikiyau
urang Pahaji. Imbah bapandiran satumat urang nintu balalu basalaman handak
bulik.
Dugal baampah ka bis lawan kawannya
tuntung sambahiyang Jumahat, cagar malanjutakan parjalanan ka Pagatan. Dugal
baharap napa nang dialaminya tadi bisa jadi kanyataan, mudahan jadi Pahaji
bujuran, kada sahibar dikiyau urang haja. (ahu)
Tidak ada komentar:
Posting Komentar